काठमाडौं, ११ साउन । गत जेठ २३ गते नयाँ प्रधानमन्त्रीमा चुनिएर डेढ महीनासम्म आफै २४ मन्त्रालय सम्हालिरहेका प्रधानमन्त्री शेरबहादुर देउवाले बुधवार मन्त्रिपरिषद् विस्तार गर्न लागेका छन् । सरकार गठनको १ महीना १८ दिनपछि सत्तारूढ दलहरूबीच मन्त्रालयको भागबण्डा र सरकारमा सहभागी हुने मन्त्रीका लागि सहमति जुटेपछि प्रधानमन्त्री देउवाले सरकार विस्तार गर्न लागेका हुन् ।
सत्ताको नेतृत्व गरिरहेको नेपाली काङ्ग्रेसको केन्द्रीय समितिको बैठक सोमवार सकिएसँगै प्रधानमन्त्री देउवाले मङ्गलवार मन्त्रिपरिषद् विस्तार गर्न लागेका थिए । तर, पार्टीभित्रैबाट सरकारमा सहभागी हुने मन्त्रीहरूको नाम छनोट नभएपछि मन्त्रिपरिषद् विस्तारको काम बुधवारलाई सरेको प्रधानमन्त्रीका प्रेस सल्लाहकार गोविन्द परियारले बताए । उनका अनुसार बुधवार दिउँसो मन्त्रिपरिषद् विस्तार गर्ने तयारी भएको छ ।
सत्तारूढ दलहरूबीच भएको मन्त्रालय भागबण्डाअनुसार सरकारमा काङ्ग्रेसले १३ र माओवादीले ९ मन्त्रालय पाउने सहमति भएको थियो । त्यसबाहेक लोकतान्त्रिक फोरम नेपाल, राप्रपा र अन्य साना दललाई समेत सरकारमा सहभागी गराउने गरी मन्त्रालय भागबण्डा मिलाइएको छ । बुधवार काङ्ग्रेसका १०, माओवादीका ६ र लोकतान्त्रिक फोरमका २ जना मन्त्री थपिने बताइएको छ । उपप्रधानसहित ४ मन्त्रालय दिने बताइएको राप्रपालाई बुधवारै सरकारमा सहभागी गराइन्छ वा पछि भन्ने निर्णय भइनसकेको प्रधानमन्त्री सचिवालयले बताएको छ ।
बुधवार हुने मन्त्रिमण्डलका लागि दलहरूले ककसको नाम सिफारिश गरेका छन् भन्ने विषयसमेत गोप्य राखिएको छ ।
किन ढिलाइ ?
वैशाख ३१ मा सम्पन्न पहिलो चरणको स्थानीय तह निर्वाचनपछि माओवादी केन्द्रका अध्यक्ष पुष्पकमल दाहालले सरकार गठन हुँदा नेपाली काङ्ग्रेससँगको भद्र सहमतिअनुसार सत्ता हस्तान्तरणका लागि राजीनामा दिएपछि देउवा नेतृत्वमा सरकार गठन भएको थियो । देउवा नेतृत्वमा रहेको आठ सदस्यीय मन्त्रिपरिषद्ले असार १४ गते दोस्रो चरणको स्थानीय तह निर्वाचनपछि मन्त्रिपरिषद् विस्तार गर्ने बताइएको थियो ।
तर, मधेशवादी दलसँगको सम्झौताबमोजिम सरकार संविधान संशोधनको कसरतमा लागेपछि संशोधनमा दुई तिहाइ पुर्याउने कसरतका कारण पुनः सरकार गठनमा ढिलाइ हुन पुग्यो । पछि संविधान संशोधन पनि नहुने देखेपछि सरकार विस्तारका लागि सत्तारूढ दल माओवादी र काङ्ग्रेसबाटै प्रधानमन्त्री देउवालाई तीव्र दबाब दिइएको थियो । माओवादी अध्यक्ष दाहालले समेत देउवाको सुस्त कार्यशैली र मन्त्रिपरिषद् ढिलाइप्रति असन्तुष्टि व्यक्त गर्दै तत्काल मन्त्रिपरिषद् विस्तार गर्न आग्रह गरेका थिए ।
काङ्ग्रेसले मन्त्रालय भागबण्डामा पाएको १३ मन्त्रालयअन्तर्गत पार्टीभित्रको गुटअनुसार मन्त्रीको नाम दिन समस्या भएपछि सरकार विस्तारमा ढिलाइ भएको थियो । यसका लागि प्रधानमन्त्री देउवाले निर्वाचनको समीक्षा र भावी कार्यदिशाका सम्बन्धमा पार्टीको केन्द्रीय समितिको बैठकपछि सरकार विस्तार गर्ने बताएका थिए । सोही कारण साउन ७ गतेदेखि बसेको केन्द्रीय समिति बैठक सोमवार सकिएपछि प्रधानमन्त्री देउवा मन्त्रीमण्डल विस्तारका लागि कस्सिएका थिए । मङ्गलवार मन्त्रिपरिषद् विस्तार गर्ने अन्तिम तयारी भए पनि पार्टीका तर्फबाट मन्त्री हुनेहरूको नाम छनोट गर्न नसकेपछि मन्त्रिपरिषद् विस्तार बुधवारलाई सरेको एक काङ्ग्रेस नेताले बताए ।
प्रधानमन्त्री एक्लैले सम्हालिरहेका मन्त्रालय
आपूर्ति, उद्योग, ऊर्जा, कृषि विकास, खानेपानी तथा सरसफाई, जनसङ्ख्या तथा वातावरण, पशुपक्षी विकास, भूमिसुधार तथा व्यवस्था, भौतिक पूर्वाधार तथा यातायात, महिला, बालबालिका तथा समाजकल्याण, युवा तथा खेलकुद, रक्षा, वन तथा भू–संरक्षण, वाणिज्य, विज्ञान तथा प्रविधि, शान्ति तथा पुननिर्माण, संस्कृति, पर्यटन तथा नागरिक उड्डयन, सहकारी तथा गरिबी निवारण, सामान्य प्रशासन, सिँचाइ, सूचना तथा सञ्चार र स्वास्थ्य मन्त्रालय रहेका छन् ।
प्रकाशित मिति: ११ श्रावण २०७४, बुधबार ०७:१६
