काठमाडौं, १० साउन । त्रिचन्द्र बहुमुखी क्याम्पस नेपाली विभागले क्याम्पसको शतवार्षिकीको पूर्वसन्ध्यामा सेवा निवृत्त पाँच प्राध्यापकलाई सम्मान गरेको छ ।
सम्मानित प्राध्यापकमा टेकप्रसाद घिमिरे, लक्ष्मीकान्त पन्थी, शशीधर खनाल, ढाकाप्रसाद घिमिरे र माधवप्रसाद घिमिरे हुनुहुन्छ । प्राध्यापकका साथ उहाँहरुका धर्मपत्नीलाई पनि सम्मान गरिएको हो ।
क्याम्पस प्रमुख प्रा डा प्रदीपबहादुर न्यौपाने, प्राध्यापक संघ त्रिचन्द्र क्याम्पस एकाइ सभापति बब्लुकान्त ठाकुर र विभागीय प्रमुख उषा अधिकारीलगायतले सम्मानित प्राध्यापकले नेपालको शैक्षिक उन्नयनमा पु¥याएको विशिष्ट योगदानको कदरस्वरुप सम्मान गरिएको बताए । प्राध्यापनको अतिरिक्त नेपाली भाषा, साहित्य, खोज अनुसन्धान र सामाजिक क्षेत्रमा चार दशकभन्दा बढी समयदेखि उनीहरुले योगदान पु¥याएको सो अवसरमा जानकारी दिइयो ।
नेपाली विभागले २०६८ सालबाट सेवा निवृत्त प्राध्यापकलाई सम्मानको कार्यक्रम राख्दै आएको छ । नेपाली भाषा, साहित्य र नाटक क्षेत्रका मूर्धन्य वक्तित्व महाकवि लक्ष्मीप्रसाद देवकोटा, साहित्यकार बालकृष्ण सम र रामराज पन्तलगायतले त्रिचन्द्र कलेजेको नेपाली विभागमा अध्यापन गरेका थिए ।
मुलुकको शैक्षिक क्षेत्रमा आफ्नै विशिष्ट इतिहास बोकेको उक्त क्याम्पसको स्थापना १९७५ भदौ ५ गते भएको थियो । विज्ञान र मानविकी संकायमा स्नातकोत्तरसम्मको पढाइ हुने त्रिचन्द्र कलेजमा हाल ११ हजार २०० भन्दा बढी विद्यार्थी अध्ययनरत रहेका छन् । रासस
प्रकाशित मिति: १० श्रावण २०७४, मंगलवार १६:४५
