ललितपुर, ५ साउन । गृहमन्त्री जनार्दन शर्माले गृह प्रशासन सुधारका लागि आफूले इमान्दार प्रयत्न गर्ने बताउनुभएको छ ।
बुधबार सुमेरु ग्रुपको १९ औँ वार्षिकोत्सवको अवसरमा यहाँ आयोजित कार्यक्रमलाई सम्बोधन गर्दै मन्त्री शर्माले भने, “मैले चमत्कारी ढङ्गले केही गर्छु भन्दिन, इमान्दार भएर काम गर्ने मेरो प्रतिबद्धता हो, त्यसबाट विचलित हुने छैन ।”
शान्ति सुरक्षा स्थापित गर्ने प्रहरी राज्यको पहिलो हात र जनताको पहिलो सहयोगी भएको गृहमन्त्रीको भनाइ थियो । उनले भने, “प्रहरी सङ्गठनको समस्या समाधान गरेर व्यवस्थित परिचालन गर्दा मनोबल बढ्ने र जनताको समस्या समाधान हुने भएकाले मैले त्यसतर्फ प्रयत्न गरिरहेको छु ।”
स्थानीय तहको तेस्रो चरणको निर्वाचनका साथै केन्द्र र प्रदेशको निर्वाचनका लागि समेत सरकारले तयारी सुरु गरिसकेको मन्त्री शर्माले जानकारी दिनुभयो ।
विवादित प्रहरी नायब उपरीक्षक दासलाई निलम्बन गर्न गृहमन्त्रीको निर्देशन
यसैगरी गृहमन्त्री जनार्दन शर्माले विवादित प्रहरी नायब उपरीक्षक सन्जिव शर्मा दासलाई अनुसन्धानका लागि निलम्बन गर्न निर्देशन दिएका छन् ।
रामेछाप लिखु गाउँपालिकाकी १४ वर्षीया सुन्तली तामाङ हत्याकाण्डको अभियुक्तलाई भगाउन भूमिका खेलेको आरोप लागेका रामेछापका तत्कालीन प्रहरी नायब उपरीक्षक दासलाई प्रहरी प्रधान कार्यालयले यसैसाता प्रहरी उपरीक्षकमा बढुवा गर्न सिफारिस गरेको थियो ।
बढुवा सिफारिसपछि सञ्चारमाध्यम र सामाजिक सञ्जालमा चर्को आलोचना भएपछि गृहमन्त्रीले प्रनाउ दासलाई अनुसन्धानका लागि निलम्बन गर्न निर्देशन दिएका हुन् । उनले सामाजिक सञ्जाल तथा सञ्चार माध्यमले प्रनाउ दासबारे उठाउनु भएको प्रश्नले बढुवा गर्दा भएको त्रुटिपूर्ण निर्णय सच्याउन मद्दत पुगेको भन्दै सबैलाई धन्यवाद दिनुभएको छ ।
घटनापछि साढे पाँच वर्ष अघिदेखि फरार अभियुक्त श्याम राउतलाई प्रहरीले एक महिनाअघि नेपाल भारतको सीमाबाट पक्राउ गरेको थियो । रासस
प्रकाशित मिति: ५ श्रावण २०७४, बिहीबार ०७:४१
