काठमाडौं, २ साउन । प्रमुख प्रतिपक्ष दल नेकपा एमालेले आगामी माघ ७ गते भित्र सबै तहको निर्वाचन सम्पन्न गर्न सरकारलाई दवाव दिइरहन निर्वाचन आयोगसँग आग्रह गरेको छ ।
एमाले संसदीय दलका उपनेता सुवाष नेम्वाङ नेतृत्वको टोलीले सोमबार निर्वाचन आयोगका पदाधिकारीसँग भेटगरी सबै तहको निर्वाचन सम्पन्न गराउने दायित्व पुरा गर्न सरकारलाई निरन्तर दवाव दिइरहन आग्रह गरेको हो ।
समयमै सबै तहको निर्वाचन सम्पन्न गर्न सरकारलाई दवाव दिइरहन निर्वाचन आयोगलाई आग्रह गरिएको एमाले संसदीय दलका उपनेता सुवाष नेम्वाङले जानकारी दिए । उनले निर्वाचन सम्पन्न गराउने आधिकारिक निकाय निर्वाचन आयोग भएको पनि स्पष्ट पारे ।
निर्वाचन आयोगले माघ ७ गते भित्र प्रदेश सभा र प्रतिनिधि सभा निर्वाचन सम्पन्न गर्न आवश्यक कानुन र निर्वाचन क्षेत्र निर्धारण गर्न सरकारलाई आग्रह गर्दै आएको छ ।
उपनेता नेम्वाङले निर्वाचनका लागि आवश्यक कानुन र निर्वाचन क्षेत्र निर्धारणको काम छिटो सम्पन्न गर्न निर्वाचन आयोगले सरकारलाई दिँदै आएको दवावलाई एमालेले सकारात्मक रुपमा लिएको पनि स्पष्ट पारेको छ ।
एमालेले निर्वाचन सम्पन्न भईसकेका जिल्लाहरुमा जिल्ला समन्वय समिति गठन अविलम्ब हुने गरी काम गर्न पनि निर्वाचन आयोगको ध्यानाकर्षण गरेको छ ।
त्यसैगरी मतदाता नामावली अध्यावधिक गर्ने काम आम मतदाताको सुविधा, सहजता र सरोकारलाई ध्यानमा राखेर पर्याप्त समय र उपयुक्त तथा आवश्यक प्रक्रिया अघि बढाउन पनि निर्वाचन आयोगलाई एमालेको सुझाव छ ।
निर्वाचन आयोगले प्रदेश सभा र प्रतिनिधि सभा प्रयोजनका लागि मतदाता नामावली अध्यावधिक गर्ने काम आइतबारबाट सुरु गरिसकेको छ । निर्वाचनमा कोही पनि नछुटून भन्ने कुरामा सचेत भएर मतदाता नामावली अध्यावधिक गर्न निर्वाचन आयोगलाई सुझाव दिइएको एमाले संसदीय दलका उपनेता नेम्वाङले बताए ।
राजनीतिक दलहरुले मतदाता नामावली अध्यावधिक गर्ने काम जिल्ला सदरमुकामबाट नभई स्थानीय तहबाटै गर्न निर्वाचन आयोगलाई सुझाव दिँदै आएका छन्। यता, निर्वाचन आयोगले भने साउन १५ गते भित्र मतदाता नामावली अध्यावधिक गर्ने कार्यतालिका अनुसारनै अघि बढने र त्यसो गर्दा समस्या देखिए समाधान गर्ने प्रतिवद्धता जनाइसकेको छ ।
प्रकाशित मिति: २ श्रावण २०७४, सोमबार १६:३४
