रामपुर (पाल्पा), २५ असार । तानसेन नगरपालिका– ७ का महेश्वर पन्त एक सफल माछापालन व्यवसायीका रुपमा चिनिन्छन्। उनी जागिर छोडेर यो व्यवसायमा लागेका हुन् ।
तीन वर्षअघि शिक्षण पेशा त्यागेर माछापालन व्यवसायलाई दिगो र आम्दानीको मुख्य स्रोत बनाएका पन्तले हाल नौ रोपनी जग्गामा माछापालन व्यवसाय गर्दै आएका हुन् ।
उनको पाँचवटा पोखरीमा सात हजार मूल्य बराबरको माछा छन् । माछा बिक्री गरेर पन्तले एक वर्षमा खर्च कटाएर रु तीन लाख बराबरको आम्दानी गर्छन् । उनको पोखरीमा कमन कार्प ,सिल्भर कार्प, रघु, नैनी, बिगेट जातका माछा छन् ।
पोखरीबाटै प्रतिकिलो रु चार सयमा माछा बिक्री भइरहेको छ । कृषि विकास कार्यालयले व्यवसायका लागि अनुदानमा माछा पोखरी निर्माणमा एक लाख २१ हजार अनुदान, अक्सिजन दिने मेसिन खरिदका लागि रु ६० हजार, दुईवटा जाल र माछाको आहारका लागि दाना सहयोग गरेपछि व्यवसायमा झनै हौसला मिलेको उनले बताए ।
विभिन्न अवलोकन भ्रमण, तालिममा सहभागी भएका उनले १३ रोपनी जग्गामा माछापालन व्यवसाय गरेर वार्षिक रुपमा रु सात लाख बराबरको आम्दानी गर्ने सोच बताएका छन् ।
सोही ठाउँकै खड्गबहादुर थापाले पनि माछापालन व्यवसाय थालेपछि उनको आम्दानी पनि बढ्दै गएको छ ।
सैनिक सेवाबाट अवकाश भएपछि थापाले आफ्नै छ रोपनी जग्गामा माछा पालेर मनग्य आम्दानी गर्दै आएका हुन् । माछाबाट एक वर्षमा रु दुई लाख जति जाहो गर्ने उनी भन्छन्,“लामो समयसम्म देशको सेवक भएर काम गरियो, “ व्यावसायिक कृषक भएर माछापालनमा लाग्दा बल्ल अहिले निकै रमाइलो महसुस भइरहेको छ” ।
त्यस्तै अर्का माछा व्यावसायी बलबहादुर थापा सरकारी जागिर भन्दा यो व्यवसाय नै राम्रो लागेको बताउछन् । उनले पनि नेपाली सेनाबाट अवकाश भएपछि माछापालन व्यवसाय सुरु गरेका हुन् ।
थापा भन्छन्,“जागिरे जिन्दगी बन्धनमै बित्छ, घरमै बसेर व्यवसाय गरे स्वतन्त्ररुपमा जीवन जिउन पाइने हुँदा अहिले जागिरे जीवन सम्झेर निकै पछुतो लाग्छ । ” रासस
प्रकाशित मिति: २५ असार २०७४, आईतवार १५:३२
