फलेवास (पर्वत), २० असार । पर्वत क्षेत्र नं २ बाट निर्वाचित व्यवस्थापिका– संसद्का सदस्य विकास लम्सालले बाढी पहिरोबाट पीडित परिवारलाई राहत दिने घोषणा गरेका छन् ।
तीन दिन पहिले पर्वतका विभिन्न स्थानमा गएको पहिरोमा परेका र बाढीले बगाएका मृतकका परिवारलाई तत्काल राहत दिने घोषणा गरेका हुन् । लम्सालले सोमबार विज्ञप्ति जारी गर्दै पीडित परिवारलाई जनही रु १० हजारका दरमा राहत दिने घोषणा गरेका छन् ।
उनले बाढी र पहिरोबाट पुगेको जनधनको क्षति प्रति दुःख व्यक्त गर्दै उद्धार र राहतमा जुट्न आह्वान पनि गरेका छन् । शनिबार राति परेको भिषण वर्षाका कारण पर्वतको महाशिला गाउँपालिका होश्राङ्दीमा पहिरोले घर बगाएपछि एकै परिवारका तीनजनाको मृत्यु भएको थियो भने खोलाले बगाएर कुश्मा नगरपालिका ९ मा १ र पैञ्यु गाउँपालिका–२ मा आठ वर्षीय एक बालकको मृत्यु भएको थियो ।
उद्धारमा जुट्न एमालेको निर्देशन
यसैबीच, नेकपा (एमाले) पर्वतले जिल्लाका कुनै पनि भागमा प्राकृतिक विपत्तिका घटना आइपरे जस्तोसुकै अवस्थामा पनि उद्धारमा जुट्न मातहतका कार्यकर्तालाई निर्देशन दिएको छ ।
आइतबार प्राकृतिक विपत्तिमा परी ज्यान गुमाएकाप्रति श्रद्धाञ्जलि व्यक्त गर्दै एक विज्ञप्तिमार्फत एमालेले उद्धार र राहत कार्यमा जुट्न निर्देशन दिएको हो । एमाले पर्वतका अध्यक्ष पदम गिरीले प्राकृतिक विपत्तिमा परेका परिवारलाई तत्काल राहत प्रदान गर्न सरकारसँग माग गरिएको बताउँदै प्राकृतिक प्रकोपबाट क्षतिग्रस्त सडक तथा अन्य संरचना पुनःनिर्माणमा तत्काल लाग्न सरकारसमक्ष आग्रह गरिएको बताए ।
जिल्लाका सबै नगरपालिका तथा गाउँपालिका स्तरका पार्टी कमिटी र वडास्तरका कमिटीमा प्राकृतिक प्रकोपका घटनामा आइपर्ने समस्यामा जस्तोसुकै चुनौती मोलेर भएपनि उद्धारमा लाग्न निर्देशन दिइएको उनले बताए ।
प्रकोपमा उद्धारका लागि पार्टी मातहतमा रहेका युवा सङ्गठनलाई समेत ‘इमिडिएट् रेस्पोन्स टिम’ खडा गरिएको उनले बताए । रासस
प्रकाशित मिति: २० असार २०७४, मंगलवार ११:३५
