रत्ननगर (चितवन), ९ जेठ । उपप्रमुख बनेको पहिलो दिन कुर्सीमा बस्दा ताराकुमारी काजी महतोलाई नौलो लाग्यो । पहिले सचिवको कुर्सीमा थिइन् अहिले उपप्रमुखको कुर्सीमा पुगिन् ।
सोमबार माडी नगरपालिकाको उपप्रमुखको कुर्सीमा बसेपछि वडाध्यक्षहरुसँग छलफल गरिन् । “परिचयात्मक कार्यक्रम भो, पहिले कर्मचारी थिएँ, अहिले जनप्रतिनिधि भएकी छु,” खुसी हुँदै ताराकुमारीले भनिन् – “अब बोझ बढेको छ ।”
उनको चिन्ता अब कसरी माडीको विकास गर्ने भन्ने छ । माडीमा जङ्गली जन्तुको आतङ्क छ । खहरे खोलानालाले माडीमा वर्षात्का बेला आतङ्क नै मच्चाउँछ ।
निकुञ्जले घेरिएको उपत्यका भएकाले स्रोतसाधन, उद्योगधन्दा छैन । त्यसैले पनि माडीको विकास गर्न चुनौती छ । “अब माडीको मुहार कसरी फेर्ने ? मेरो चिन्ता नै त्यही हो ” – ताराकुमारीले भनिन् ।
गएको वैशाख १७ गते माडीको वडा सचिवबाट राजीनामा दिँदै गर्दा ताराकुमारीलाई खासै चिन्ता भएन । पार्टीबाटै तपार्इं आउनुपर्यो भनेपछि उनले राजीनामा दिएर उपप्रमुखको आकाङ्क्षा राखिन् ।
उपप्रमुख भए पनि नभए पनि जागिर गुमेकामा कुनै चिन्ता लागेन ताराकुमारीलाई । “कति गर्नु एउटै काम, जे त होला भनेर त्यागेँ” – ताराकुमारी काजीले भनिन् । नेकपा एमालेबाट नारायण पौडेल, चन्द्र बानियाँ र ताराकुमारीको नाम सिफारिस भयो र पछि उनी छानिइन् ।
प्रमुखमा नेकपा माओवादी केन्द्रको उम्मेदवार भए पनि उपप्रमुखमा अन्ततः जित उनकै भयो । उनले माओवादी केन्द्रका सरिता चौधरीलाई हराइन् । उनको मत चार हजार ६९० आयो भने प्रतिद्वन्द्वीको तीन हजार ८०४ आयो । सर्वाधिक मत ल्याउनेमा उनी परिन् । माडीलाई इको नगर बनाउने, सुकुम्बासी समस्या समाधान गर्ने, खोलानालाको व्यवस्थापन गर्ने, जङ्गली जनावर आक्रमण न्यून गर्ने तथा कृषि उत्पादनको वृद्धिमा लाग्ने उनले अठोट गरेकी छन् ।
माडीका स्थानीयवासी गोविन्द न्यौपानेले अन्य उम्मेदवारलाई पछि पारेर जित्नुमा उहाँको सामाजिक व्यक्तित्व र गाविसमा छँदा कमाएको इज्जत नै भएको दाबी गर्छिन् ।
त्यसैले पनि प्रमुखमा माओवादी केन्द्र जित्दै गर्दा एमालेबाट उनी उपप्रमुखमा निर्वाचित भएकी हुन् । दलित महिला सदस्यमा विजयी भएकी माडीका इन्दिरा विक अरु पार्टीको पनि मत तात्न ताराकुमारी सफल भएको बताउँछिन् । भोट माग्न जाँदा पनि उनको नाम मतदाताबाट आउने गरेको विक अनुभव सुनाउँछिन् ।
त्रिचालीस वर्षीया ताराकुमारीको घर माडी वडा नं ३ वसन्तपुर हो । प्लस टु उत्तीर्ण उहाँका दुई छोरी छन् । श्रीमान् जयराम महतो शिक्षक हुन् ।
एसएलसीपछि २० वर्षमा बिहे भएको थियो उनको । छोरी जन्मेपछि कष्टले प्लस टु गरेको अनुभव सुनाउँछिन् उनी । विसं २०६१ मा पहिलोपटक उनले जागिर सुरु गरिन् ।
युनिसेफमा बालबालिकासम्बन्धी परियोजनामा जागिर पाइन् । त्यसपछि उहाँले २०६३ सालमा साविक बघौडा गाविसको कार्यालय सहायकको जागिर पाइन् । त्यसपछि माडी नगरपालिका बन्यो ।
उनी वडा नं ३, ४, ५ को वडा सचिव बनिन् । वडा सचिवमा बहालमा रहँदारहँदै स्थानीय निकायको निर्वाचन आएपछि वैशाख १६ मा राजीनामा दिएर राजनीतिमा होमिनुभएका उहाँले अब विकासमा लाग्ने अठोट गर्नुभएको छ । उनी भन्छिन् – “अब मैले गरेर देखाउने दिन आएको छ ।” रासस
प्रकाशित मिति: ९ जेष्ठ २०७४, मंगलवार १४:२८
