काठमाडौँ, ८ जेठ । नेपाल राजकीय प्रज्ञा–प्रतिष्ठानको हीरक जयन्तीका अवसरमा ‘समकालीन नेपाली आख्यानमा राजनीति’ विषयक कार्यशालामा वक्ताले लेखक निरपेक्ष हुनुपर्ने, साहित्यकार राजनीतिबाट शुन्य हुनुपर्ने, पूर्वाग्रह हुन नहुने र पूर्वाग्रह भए पाठक पनि पूर्वाग्रही हुनसक्ने सम्भावना व्यक्त गरेका छन् ।
उनहरुले नेपाली साहित्यमा यथार्थवादी धार, यथास्थितिवादी धार रहेको बताउँदै २०६२÷६३ सालको आन्दोलनपछि पहिचानको धार पनि आएको चर्चा गर्दै लेखकले जे सत्य हो त्यो लेख्नुपर्छ, लेखकले आफ्नो विचार पाठकमा लाद्न हुँदैन भने ।
कार्यक्रममा आख्यानकार नारायण ढकालले साहित्यकारले निरपेक्ष विचारले लेख्नुपर्ने बताउँदै समाजका हरेक वर्गको विचारलाई समेट्न सक्नुपर्ने बताए ।
वरिष्ठ महिला साहित्यकार आम्बिका गिरीले पाँच हजार वर्षदेखि पितृसत्तात्मक राज्य चल्दै आएकाले महिला महिलामाथि दमन गरेको तथा तीन हजार वर्षदेखि वैज्ञानिक, प्राविधिक, सफाइ अभियन्तालाई अछुत भनी हेला गरेको बताए ।
साहित्यकार आहुतीले स्तरीय लेखनबाट मात्र आख्यान लोकप्रिय हुने बताउँदै धर्ममा निरपेक्षता, जातीय पहिचानको कुरा तथा भावुकताको राजनीतिमा पनि विशेष ध्यान दिनुपर्ने बताए ।
कार्यक्रममा साहित्यकार कृष्ण धारावासी, विष्णु ज्ञवाली तथा डा पुष्करराज भट्टले पनि बोलेका थिए । रासस
प्रकाशित मिति: ८ जेष्ठ २०७४, सोमबार ०६:५४
