गुलरिया (बर्दिया), २९ वैशाख । पर्यटन प्रवद्र्धन गर्नका लागि थारू सास्ंकृतिक कला, भाषा संरक्षण र प्रवद्र्धन गर्ने उद्देश्यका साथ राजापुर नगरपालिका–८ सदुवामा बडघर विहिबार अन्तरक्रिया र सांस्कृतिक कार्यक्रमको आयोजना गरियो ।
बेस संस्था बर्दियाको आयोजनामा भइरहेको उक्त कार्यक्रमका सभापति बडघर भलमन्सा महतवा महासङ्घ बर्दियाका जिल्ला अध्यक्ष रामशाही थारू रहेको कार्यक्रमका प्रमुख अतिथि बेस कार्यवाहक केन्द्रीय सदस्य यज्ञराज चौधरीले स्थानीय थारू जातिका थारू सास्ंकृतिक कला, भाषा संरक्षण र प्रवर्धन के कसरी गर्न सकिन्छ भन्ने विषयमा आफना विचार व्यक्त गरेका थिए ।
उनीहरुले थारू समुदायमा परम्परादेखि नै चल्दै आएको बरघर महतवा भलमन्सा प्रथालाई राष्ट्रियस्तरमा पुर्याउन र संस्थागत गर्न आफूहरुले सकेसम्म सहयोग गर्ने, थारू कला, भाषा र संस्कृतिको संरक्षण र प्रवद्र्धनमा युवालाई जागरुक बनाउने र थारू साँस्कृतिक कलाको राष्ट्रियस्तरसम्म विकास र पहिचान गराउन आफूहरु सधैँ लागिपर्ने बताए ।
उक्त कार्यक्रममा बर्दिया जिल्लाका स्थानीय क्षेत्रमा रहेका थारू जातिका प्रसिद्ध मघौटा नाच, हुर्दुङ्गुवा नाच, झुम्री नाच, सखिया नाच, लट्ठी नाचलगायत थारू सांस्कृतिक नृत्य कला प्रतियोगितामा बर्दिया जिल्लाका १० वटा समूहभन्दा बढी प्रतियोगी समूहको सहभागिता रहेको छ ।
यसैबीच, राजापुर प्राथमिक स्वास्थ्य केन्द्र राजापुर बर्दियामा विहिबारदेखि तीनदिने निःशुल्क दन्त शिविर पनि सञ्चालन भएको छ ।
शिविरमा दाँतका समस्या भएका बिरामीलाई डा अनिल शाह र गजेन्द्रविक्रम शाहको प्राविधिक टोलीले उपचार सेवा प्रदान गरेको छ । रासस
प्रकाशित मिति: २९ बैशाख २०७४, शुक्रबार ११:१०
