भक्तपुर, २७ चैत । मदरल्यान्ड इङलिस बोर्डिङ सेकेन्डरी स्कुलले आज एउटै मञ्चबाट ख्यातिप्राप्त गायिका, कलाकार र साहित्यकारलाई सम्मान गरेको छ ।
सम्मानित हुनेमा गायिका कोमल वली, एसपी चापागाईँ (बान्द्रे), राष्ट्रिय म्याराथन खेलाडी एवम् ओलम्पियन कान्छीमाया कोजू, साहित्यकार रामगोपाल आशुतोष र शिक्षाविद् पदमराज तिवारी छन् । स्कूलको १७आैँ वार्षिकोत्सवका अवसरमा यहाँ आयोजित अभिभावक भेलामा नेसनल प्याब्सनका अध्यक्ष कर्णबहादुर शाहीले उनीहरुलाई सम्मानपत्रसहित नेपाली खादा ओढाएर सम्मान गरेका हुन् ।
त्यसैगरी विद्यालयका लेखापाल एवम् शिक्षिका सबिना केसी र विद्यालयका उत्कृष्ट विद्यार्थीलाई सम्मान गरिएको र सांस्कृतिक कार्यक्रम प्रस्तुत गरिएको प्राचार्य सञ्जय खड्काले बताए ।
श्रीगोपाल शिरपा हनुमान नाचलाई
प्रत्येक दुई वर्षमा प्रदान गरिँदै आएको श्रीगोपाल कला शिरपा (पुरस्कार) यस वर्ष बाग्लुङ जिल्लाको परम्परागत हनुमान नाचलाई प्रदान गरिएको छ ।
थिमि कला परिषद्ले आज यहाँ आयोजना गरेको कार्यक्रममा लामो समयदेखि परम्परागत हनुमान नाच संरक्षणमा योगदान पुर्याएबापत रु २५ हजार एक, ताम्रपत्र र चाँदीको पदक प्रदान गरियो ।
कार्यक्रममा नेपाल मजदुर किसान पार्टीका अध्यक्ष नारायणमान बिजुक्छेले जनसङ्ख्याका आधारमा स्थानीय तह निर्धारण गर्नुपर्ने र निर्वाचनअघि नै तराईमा मतदाता सङ्ख्या थप गर्नुपर्ने माग विदेशीको इसारामा आएको बताए ।
प्रतिष्ठानका अध्यक्ष श्यामकृष्ण मानन्धर, परिषद्का सचिव ज्ञानराम श्रेष्ठ, शिरपाका दाता गणेशराम प्रजापति, कलाविज्ञ अरुणा नकर्मीलगायतले कला र संस्कृतिको जगेर्नामा लाग्ने व्यक्ति वा संस्थालाई राज्यले नै कदर गर्ने व्यवस्था गर्नुपर्नेमा जोड दिए ।
परिषद्ले यसअघि पनौतीको देवी नाच, बोडेको नीलबाराही नाच, वाद्यगुरु न्हुच्छेमान डङ्गोल, समाजसेवी श्यामकृष्ण मानन्धरलगायतलाई सो शिरपा प्रदान गरेको थियो । रासस
प्रकाशित मिति: २७ चैत्र २०७३, आईतवार १५:१९
