नगरकोट, १८ चैत । बहुअपाङ्गता भएका बालबालिकालाई विद्यालयसम्म ल्याउन र पुर्याउन सहज होस भन्ने उद्देश्यले मद्दत नेपाल फाउन्डेसन हल्यान्ड नामक संस्थाले भक्तपुरका एक विद्यालयलाई आज स्कुल बस हस्तान्तरण गरेको छ ।
भक्तपुर नगरपालिका–१५ इन्द्रायणीस्थित समुदायमा आधारित पुनःस्थापना संस्था (सिबिआर) भक्तपुरलाई सो बस उपलब्ध गराइएको हो । बहुअपाङ्गता भएका बालबालिकालाई निःशुल्क सेवा उपलब्ध गारउनका लागि रु २५ लाख २० हजार मूल्य पर्ने बस उपलब्ध गराइएको सो संस्थाले जनाएको छ ।
फाउन्डेसनका अध्यक्ष हेम्मी क्लेभिसले भक्तपुरमा बिहीबार आयोजित एक कार्यक्रमका बीच सिबिआरका उपाध्यक्ष सुरेश प्रधानलाई सो बसको साँचो हस्तान्तरण गरे । सिबिआरले बहुअपाङ्गता भएका बाबालिकालाई पढाउने गर्दछ ।
सो अवसरमा अध्यक्ष क्लेभिसले तीन वर्षसम्मका लागि उक्त बसका चालक, सहयोगी, तेल र मर्मतसम्भारमा लाग्ने सम्पूर्ण खर्च व्यहोर्ने घोषणासमेत गरे ।
उनले घरआँगनसम्म गाडी नपुग्दा सिबिआरस्थित विद्यालयमा आउन नसकेका बहुअपाङ्गता भएका बालबालिकाको सुविधाका लागि उक्त सहयोग गरिएको सुनाए ।
त्यस्तै फाउन्डेसनकै पाउली जेरिक्सनले बहुअपाङ्गता भएका बालबालिका घरमा बस्दा आमाले भोग्नुपर्ने समस्या र पीडा भयावह र व्यक्त गर्न नसकिने हुने आफूले बुझेको बताए ।
उनले भूकम्पपछि नेपाल आउँदा बहुअपाङ्गता भएका बालबालिका र उनका आमाहरुको जीवन झन कष्टकर बनेको आफूले देखेको स्मरण गरे ।
भक्तपुरका पर्यटन व्यवसायी चूडामणि कायस्थले मद्दत नेपाल फाउन्डेसनलाई सिबिआरको सम्पर्कमा ल्याएका हुन् । उनकै पहलमा दुई वर्षअघि सिबिआरमा बहुअपाङ्गता भएकाका लागि स्कुल भवन र अहिले स्कुल बस सहयोग प्राप्त भएको हो ।
सिबिआरका उपाध्यक्ष सुरेश प्रधानकाअनुसार गाडी सुविधा नहुँदा करिब २१ जना बहुअपाङ्गता भएका बालबालिका स्कुलसम्म आउन सकेका छैनन् ।
मद्दत नेपाल फाउन्डेसनले यसअघि करिब रु ३५ लाखको लागतमा बहुअपाङ्गता भएका बालबालिकाका लागि सिबिआर, भक्तपुर परिसरमै विद्यालय निर्माण गरिदिएको थियो । रासस
प्रकाशित मिति: १८ चैत्र २०७३, शुक्रबार १३:१४
