मेलम्ची, १४ चैत । सिन्धुपाल्चोक जिल्लाको भिमटार र बाहुनेपाटीमा अस्थायी प्रहरी चौकी निर्माण गर्न आइतबार चौकीको शिलान्यास गरिएको छ ।
रु दुई करोड ५० लाख ८८ हजार ५१ लागतमा निर्माण हुन लागेको चौकीको सिन्धुपाल्चोक प्रहरी प्रमुख प्रहरी उपरीक्षक रवीन्द्र केसीले शिलान्यास गरेका हुन् ।
प्रहरी प्रमुख केसीले जिल्लाको प्रहरी चौकी पुनःनिर्माणको काम आफूहरुको प्राथमिकतामा रहेको बताएका थिए ।
जिल्लामा रहेका ३१ वटा प्रहरी चौकीमध्ये हाल २७ वटा चौकी निर्माणका लागि पुनःनिर्माण प्राधिकरणबाट बजेट विनियोजन भइसकेको छ ।
आइतबार मात्र दुई वटा चौकी निर्माणका लागि शिलान्यास भएको र इलाका प्रहरी कार्यालय मेलम्चीको मातहतमा रहेको तिपेनी, भोटेचौर, मानेखर्क सेरा र ठोर्कपाको भवन शिलान्यासको क्रममा रहेको केसीले जानकारी दिए ।
त्यस्तै दोलखा जिल्लाको सिमानामा पर्ने मुडे र ठूलोपाखर, बलेफी, इर्खु, तेम्बाथान तथा फुल्पिङकट्टीमा टेन्डरको प्रक्रिया सुरु भइसकेको जिल्ला प्रहरी कार्यालयले जानकारी दिएको छ ।
चौकी निर्माणका लागि बाँकी रहेको स्थानमा जग्गा उपलब्ध हुने बित्तिकै भवन निर्माणको कार्य थालिने प्रहरी प्रमुख केसीले जानकारी दिए । रासस
प्रकाशित मिति: १४ चैत्र २०७३, सोमबार ११:३३
