काठमाडौँ, १३ चैत । श्रमिक क्षेत्रमा देखिएको समस्या र चुनौती समाधानका लागि श्रम आयोग गठन गर्नुपर्नेमा वक्ताहरुले जोड दिएका छन् ।
नेपाल यातायात मजदुर सङ्घको भवन उद्घाटन समारोहमा आज यहाँ आयोजित कार्यक्रममा उनीहरुले श्रम क्षेत्रमा देखिएका समस्या समाधानका लागि श्रम आयोग गठन गर्नुपर्ने बताए ।
सो अवसरमा नेपाली काँग्रेसका नेता डा शेखर कोइरालाले काँग्रेस पार्टीले स्थापनाकालदेखि नै श्रमिकको हक र हितका लागि काम गर्दै आएको बताए । उनले भने– “काँग्रेसको जन्म नै मजदुर आन्दोलनको जगमा भएको हो ।”
नेता डा कोइरालाले श्रम आयोग गठनका लागि श्रमिक सङ्घ सङ्गठनले निरन्तर लाग्नुपर्ने आवश्यकता औल्याए ।
एक फरक प्रशङ्गमा नेता कोइरालाले देश अत्यन्त नाजुक अवस्थामा अगाडि बढेको भन्दै यसको समाधानका लागि सबै राजनीतिक दल एक हुनुपर्नेमा जोड दिए ।
मधेसी मोर्चालाई सँगसँगै लिएर अगाडि बढेमात्र निर्वाचन सम्भव हुने र मुलुक आर्थिक विकासको बाटोमा अगाडि बढ्ने उनले बताए ।
नेपाल ट्रेड युनियन काँग्रेसका नेता एवम् सांसद पुष्कर आचार्यले मजदुर आन्दोलनका कारण मुलुकमा संविधान निर्माण भएको बताउँदै मजदुरका समस्यालाई राज्यले बेवास्ता गर्न नहुने धारणा व्यक्त गरे ।
इन्टरनेसनल ट्रान्सफोर्ट फेडेरेसनका महासचिव सङ्गम त्रिपाठीले मजदुरको समस्या समाधानका लागि सबै मजदुर एक हुनुपर्ने बताए ।
सङ्घका अध्यक्ष अजयकुमार राई, पूर्व सांसद अच्युत पाण्डे, नेपाल ट्रेड युनियन काँग्रेसका उपाध्यक्ष गणेश निरौला, महासचिव महेन्द्र यादवलगायतले ट्रेड युनियनको समस्याप्रति पार्टी गम्भीर हुनुपर्नेमा जोड दिए ।
सो अवसरमा इन्टरनेसनल ट्रान्सफोर्ट फेडेरेसनले नेपाल यातायात मजदुर सङ्घको भवन निर्माणका लागि रु पाँच लाख आर्थिक सहयोग प्रदान गरेको छ । रासस
प्रकाशित मिति: १३ चैत्र २०७३, आईतवार १४:४१
