काठमाडौँ, २ चैत । राष्ट्रिय सूचना आयोगले राज्यबाट पाउने महिला लक्षित आर्थिक सुविधासम्बन्धी पुस्तिका मैथिली, तामाङ, डोटेली र थारू भाषामा प्रकाशित गरेको छ ।
आयोगले एकसय सातौँ अन्तर्राष्ट्रिय महिला दिवसका अवसरमा आज यहाँ आयोजित कार्यक्रममा शान्ति तथा पुनर्निर्माण मन्त्री सीतादेवी यादवले उक्त पुस्तिका सार्वजनिक गरीन् । मन्त्री यादवले चार भाषामा प्रकाशित महिलाको आर्थिक सुविधासम्बन्धी पुस्तक प्रकाशन महत्वपूर्ण रहेको उल्लेख गर्दै पुस्तक हिमाल, पहाड र तराईका महिलासम्म पुर्याउन आग्रह गरीन् ।
उनले १० वर्षे द्वन्द्वकालमा बेपत्ता पारिएका व्यक्तिलाई अहिलेसम्म सरकारले राहत दिन नसकेको र सरकारले पीडितको घाउमा मलम लगाउने प्रयास गरिरहेको बताइन् ।
आयोगका प्रमुख सूचना आयुक्त कृष्णहरि बास्कोटाले राज्यले महिलालाई के के आर्थिक सुविधा प्रदान गरेको छ भन्ने बारेमा नेपालीबाहेक अन्य भाषाभाषीलाई पनि बुझ्न सहज होस् भन्ने उद्देश्यले थप चार भाषामा प्रकाशन गरेको जानकारी दिए ।
आयोगका सूचना आयुक्त किरण पोखरेलले नेपाली महिलाको आफ्नो हकअधिकारको लडाइँ अझै बाँकी रहेको र महिला सशक्तीकरण गर्दा सीपलाई बढी ध्यान दिनुपर्नेमा जोड दिए ।
आयोगका सूचना आयुक्त यशोदा तिमिल्सिनाले गत वर्ष नेपाली भाषामा २० हजार प्रति महिलाको आर्थिक सुविधासम्बन्धी पुस्तिका प्रकाशन गरेको र कतिपय स्थानमा नेपाली भाषा महिलालाई पढ्न असहज भएकाले थप चार भाषामा पुस्तिका प्रकाशन गरेको जानकारी दिइन् ।
सहभागीले नेपालीसहित अन्य भाषामा पनि प्रकाशन गर्नु उल्लेखनीय काम भएको र नीतिनिर्माण गर्ने र ग्रामीण महिलासम्म पुर्याएर प्रचार गर्नुपर्ने धारणा राखेका थिए । रासस
प्रकाशित मिति: २ चैत्र २०७३, बुधबार १५:४१
