काठमाडौँ, २६ फागुन । नेपाल पत्रकार महासङ्घका अध्यक्ष डा महेन्द्र विष्टले राष्ट्रिय समाचार समितिलाई राष्ट्रकै बलियो समाचार एजेन्सी बनाउनुपर्नेमा जोड दिएका छन् ।
महासङ्घ रासस प्रतिष्ठान शाखाको साताैँ अधिवेशन उद्घाटन गर्दै उनले राससलाई सरकारले विशेष प्राथमिकता राखेर अझ ठूलो एजेन्सीका रुपमा विस्तार गर्नुपर्ने बताएका हुन् ।
‘‘राससले नेपालका बारेमा राम्रा विषयवस्तुमा आधारित समाचार दिएर विश्वमा चिनाउनेखालका समाचार दिनुपर्यो”, अध्यक्ष डा.विष्टले भने – “सार्क र अन्तर्राष्ट्रियस्तरमा अझै सेवा विस्तार गर्नुपर्छ ।”नेपाली पत्रकारिताको विकासमा राससको उल्लेखनीय भूमिका रहेको उल्लेख गर्दै नयाँ परिवेशमा राससले नयाँ ढङ्गले समाचार सम्प्रेषण गर्नुपर्ने धारणा पनि उनले व्यक्त गरे ।
महासङ्घले पत्रकारको पेसागत, हकहित र सामाजिक सुरक्षामा ध्यान दिएको छ भन्दै अध्यक्ष डा. विष्टले पत्रकारिता पेसा आवेशपूर्ण हुन थालेकाले संयमित भएर काम गर्न सुझाव दिए । “हामी संयमित हुन नसके दुर्घटना पनि हुन सक्ने भएकाले द्वन्द्व र विवाद बढ्ने खालका समाचार दिनुभएन ।” उनको भनाइ थियो ।
कार्यक्रममा महासङ्घका केन्द्रीय सदस्य शीतल महतोले राससमा कार्यरत पत्रकारको क्षमता विस्तार गर्नुपर्नेमा जोड दिए ।
सदस्य तथा प्रतिष्ठानका संयोजक सुरज आचार्यले राससको व्यवस्थापन पक्षको सुधार गर्नुुपर्ने बताए ।
शाखा अध्यक्ष विष्णु नेपालको सभापतित्वमा सम्पन्न कार्यक्रममा राससका नायब महाप्रबन्धक सुरेन्द्रबहादुर नेपाली, महासङ्घका केन्द्रीय सदस्य माधव दुलाल, रोशन पुरी, राससका पूर्व महाप्रबन्धक श्रीरामसिंह बस्नेत, महासङ्घको रासस शाखाका पूर्व अध्यक्ष कृष्ण बुढाथोकी, रासस प्रेस युनियनका अध्यक्ष नारायण घिमिरे, रासस प्रेस चौतारीका अध्यक्ष कृष्णराज गौतमले अधिवेशनको सफलताको कामना गरेका थिए । रासस
प्रकाशित मिति: २६ फाल्गुन २०७३, बिहीबार १७:४४
