काठमाडौँ, २० फागुन । नेपाली काँग्रेसका नेता प्रकाशमान सिंहले स्थानीय तहको निर्वाचनका लागि सबै दल एकजुट हुनुपर्ने बताए ।
जोसेफ माध्यामिक विद्यालय कपनको २० औँ वार्षिकोत्सवका अवसरमा यहाँ आज आयोजित ‘अभिभावक दिवस, सम्मान तथा पुरस्कार वितरण समारोह’मा नेता सिंहले सरकारले निर्वाचनको मिति तोकेकाले निर्वाचन गराउन सबै दल गम्भीर हुनुपर्ने बताएका हुन् ।
संविधान जारी गर्ने दल नै संविधान जोगाउनतर्फ लाग्नुपर्ने उनको भनाइ थियो ।
पूर्वउपप्रधानमन्त्री सिंहले नेपाललाई राजनीतिक स्थिरता दिएर विकास निर्माणको बाटोमा लैजानुपर्ने बताए । उनले विद्यालयलाई गुणस्तरीय शिक्षा दिन आग्रह गरे ।
कार्यक्रममा वरिष्ठ सङ्गीतकार शम्भुजित बाँस्कोटाले विद्यार्थीलाई सैद्धान्तिक शिक्षाको साथसाथै गीत सङ्गीतका माध्यमबाट बहुप्रतिभावान् बनाउनु आवश्यक रहेको बताए ।
विद्यालयका प्राचार्य सूर्यबहादुर अधिकारीले गुणस्तरीय शिक्षाका लागि विद्यालयले कुनै कसर बाँकी नराख्ने बताए । विसं २०५४ मा १५ जना विद्यार्थीबाट पठनपाठन सुरु गरेको उक्त विद्यालयले हाल एक हजार ७०० विद्यार्थीलाई पठनपाठन गराएको छ ।
विभिन्न क्षेत्रमा योगदान पुर्याएका पाँच व्यक्तिलाई सम्मान
सो अवसरमा विद्यालयले विभिन्न क्षेत्रमा विशेष योगदान पुर्याएका पाँच जनालाई सम्मान गरेको छ ।
सम्मानित हुनेमा पूर्वसभामुख एवम् वरिष्ठ मानवअधिकारकर्मी दमननाथ ढुङ्गाना, वरिष्ठ सङ्गीतकार शम्भुजित बाँस्कोटा, हास्यकलाकार तथा चलचित्र निर्देशक दिपाश्री निरौला, हिमालय शेर्पा क्लबका अध्यक्ष कर्माछिरिङ शेर्पा र अनलाइन पत्रकार सङ्घका अध्यक्ष मुकुन्द ढुङ्गाना रहेका छन् ।
उनीहरुलाई दोसल्ला र प्रमाणपत्रले सम्मान गरिएको थियो । रासस
प्रकाशित मिति: २० फाल्गुन २०७३, शुक्रबार १८:३८
