राजविराज (सप्तरी), ७ फागुन । राष्ट्रिय समाचार समिति (रासस) लाई निष्पक्ष र स्वतन्त्र बनाउनाका साथै यसको सेवालाई ग्रामीण क्षेत्रसम्म पुर्याउनुपर्ने औँल्याइएको छ ।
राससको ५६ आैं वार्षिकोत्सवका अवसरमा यसको सेवालाई प्रभावकारी बनाउन विभिन्न क्षेत्रका व्यक्तित्वसँग लिइएको प्रतिक्रियामा राससलाई प्रविधियुक्त सञ्चार संयन्त्र बनाउनुपर्ने सुझाव प्राप्त भएको छ । देश सङ्घीय संरचनामा गइसकेकाले यसको सेवालाई पनि सङ्घीय संरचनानुसार लैजानुपर्ने उनीहरुको भनाइ छ ।
राससको सेवामा पञ्चायतकालीन ढर्राबाट निक्लिएर खासै सुधार नभएकाले त्यसलाई पूर्ण व्यवासयिकीकरण गरिनुपर्ने आवश्यकता औँल्याइएको छ ।
राससको दिगो विकासका लागि पूर्वाधारको विकास, उच्च सञ्चार प्रविधि उपयोग गर्नेुपर्नमा पनि जोड दिइएको छ । सद्भावना पार्टीका महासचिव मनिषकुमार सुमन रासस एकता र विश्वसनीयताको प्रतीक रहेको उल्लेख गर्दै यसले आधुनिक प्रविधि र नयाँ शैलीबाट समाचार सम्प्रेषण गर्नुपर्ने बताउनुहुन्छ । उहाँले समाजमा फैलिएको विकृति र विसङ्गतिका विरुद्ध तथा बिनाभेदभाव समाचार सम्प्रेषण गर्नुपर्ने सुझाव दिए । सोही दलका जिल्ला नेता लक्ष्मण यादवले राससले ठूला र साना दलका समाचार सम्प्रेषणमा धेरै भेदभाव गरेको गुनासो पनि गरे ।
नेपाली काँग्रेसका महाधिवेशन प्रतिनिधि उमेश मिश्रले नेपालको सञ्चारमाध्यमा काम गर्ने पत्रकार सम्बन्धित स्थलमा नजाने र सुनेका भरमा समाचार लेख्ने परिपाटी बढ्दै गएकामा गुनासो गर्दै राससको सेवालाई चुस्तदुरुस्त र ग्रामीण क्षेत्रसम्म पुर्याउनुपर्ने विचार व्यक्त गर्नुभयो ।
पत्रकार शिवहरि भट्टराईले सञ्चारमाध्यमको भूमिकामा राससले नेपालीलाई सूचना दिने काम गरेकामा प्रशंसा गर्दै सदैव सत्यतथ्य समाचार दिएकाले यसको विकास गर्नुपर्ने औँल्याए ।
उद्योगी लक्ष्मी चौधरीले देशको औद्योगिक तथा व्यापरिक विकास प्रवद्र्धनका लागि रासस खट्नुपर्ने बताउँदै राससको समाचारसबैलाई समेटेर सम्प्रेषण गर्नुपर्नेमा जोड दिनुभयो । जिल्ला कृषि विकास कार्यालयका वरिष्ठ कृषि विकास अधिकृत भगीरथ यादवले नेपाल कृषिप्रधान मुलुक भएकाले कृषि समाचारलाई प्राथमिकता दिनुपर्ने बताउँदै कृषिसम्बन्धी छुट्टै बुलेटिन निकाल्नु सुझाव दिए ।
स्वास्थ्यकर्मी तथा औषधि व्यवसायी अजयकुमार झाले स्वास्थ्यसम्बन्धी समाचार सम्प्रेषणमा राससले खासै महत्व नदिएको गुनासो गर्दै स्वास्थ्य समस्या र बिरामीले भोग्नुपरेका विभिन्न समस्यालाई राससले उजागार गर्नुपर्ने बताउँदै शिक्षक विपीन झाले राससको समाचार समावेशी हुनुपर्ने उल्लेख गर्दै शिक्षा क्षेत्रमा देखिएको विकृति र विसंगति हटाउनेतर्फ कलम चलाउनुपर्ने बताए । समाजसेवी सुशीललाल दासले राससको गरिमा र विश्वास बढाउनेतर्फ पत्रकार लाग्नुपर्छ भने । रासस
प्रकाशित मिति: ७ फाल्गुन २०७३, शनिबार ०९:१५