काठमाडौ १५ माघ । पश्चिमी वायुको प्रभावले मुलुकभरको मौसम बदली भएको छ । शुक्रबार केही स्थानमा छिटफुट वर्षा भयो भने उच्च पहाडी क्षेत्रमा व्यापक हिमपात भएको छ । शुक्रबार बिहानैदेखि आकाश धुम्मिनुका साथै सिमसिम वर्षा भएपछि जनजीवन प्रभावित भएको छ । बिहीबार पश्चिम नेपाल हुँदै आएको वायुको प्रभाव उपत्यकासहित शुक्रबार पूर्वी नेपालसम्म पुगेको जल तथा मौसम पूर्वानुमान महाशाखाले जनाएको छ । ‘शुक्रबार मुलुकभर वर्षा भएको छ भने उच्च पहाडी क्षेत्रमा हिमपात भएको छ,’ मौसम पूर्वानुमान महाशाखाका वरिष्ठ मौसमविद् वरुण पौडेलले भने,
‘शनिबार बिहानदेखि भने घाम लाग्न थाल्छ ।’ देशका पश्चिमी क्षेत्रमा बिहीबार साँझदेखि नै पानी पर्न सुरु भएको थियो । यो वर्ष १ माघमा ०.४ डिग्रीसम्म पुगेको काठमाडौंको न्यूनतम तापक्रम त्यसपछि निरन्तर बढिरहेको थियो । केही दिनसम्म राजधानीको आकाशमा बादल थिएन । यो साताको सुरुसँगै बादल देखिन थालेको थियो । बिहीबार मध्यरातबाट बादलले उपत्यकाको आकाश धुम्म भएको थियो । पानी परेसँगै केही दिन बिहान काठमाडौंमा अलि बढी चिसो हुने र त्यसपछि विस्तारै तापक्रम बढ्दै जाने उनले जानकारी दिए । माघमा पर्ने पानीलाई चिसो समाप्त भई तातो बढ्ने वर्षाको रूपमा लिने गरिएको छ ।
सिमसिम पानी र अचानक बढेको चिसोले विद्यार्थी, बटुवा र आमजनजीवन खल्बलियो । सम्भवतः वर्षकै अन्तिम जाडोको दिनको रूपमा लिन सकिन्छ । ‘पश्चिमी न्यून चापीय प्रणाली’ बिहीबार राति मुलुकको पश्चिम भाग प्रवेश भएसँगै उत्पन्न भएको बदलीका कारण शुक्रबार मुलुकभर वर्षा भएको हो । पूर्वानुमान महाशाखाका मौसमविद् सुवास रिमालका अनुसार बदलीसँगै उच्च भागमा हिमपातसमेत भएको छ ।
भूमध्यसागरमा उत्पन्न भएको मौसमी प्रणाली इरान, अफगानिस्तान, पाकिस्तान, जम्मुकाश्मीर, उत्तराखण्ड हुँदै बिहीबार बेलुकी सुदूरपश्चिमी भागमा प्रवेश भएको हो । ‘त्यो प्रणाली शक्तिशाली भएकाले देशैभर असर प¥यो,’ मौसमविद् रिमालले भने, ‘तराईदेखि हिमाली क्षेत्रसम्मै असर परेको छ । धेरै भागमा पानी परिरहेको छ ।’ उनका अनुसार उक्त प्रणाली पूर्वतर्फ सरेको छ ।
मौसम पूर्वानुमान महाशाखाको तथ्यांकअनुसार शुक्रबार सबैभन्दा बढी वीरेन्द्रनगरमा २७ दशमलव ८ मिलिमिटर वर्षा भएको थियो भने जुम्लामा २० मिलिमिटर वर्षा भएको थियो । यस्तै दाङमा १६ दशमलव ९, भैरहवामा १४ दशमलव ८, दिपायलमा १३ दशमलव २, धनगढीमा ९ मिलिमिटर वर्षा भएको थियो । यस्तै, डडेल्धुरामा ७ दशमलव ७ मिलिमिटर वर्षा भयो भने नेपालगन्जमा ६ दशमलव ३ मिलिमिटर वर्षा भएको महाशाखाले जनाएको छ । काठमाडौंमा ५ मिलिमिटर वर्षा भयो भने राति अबेरसम्म वर्षा भएको थियो । यसैगरी सिमरामा ३ दशमलव ४ मिलिमिटर, पोखरामा ३ दशमलव १, जोमसोममा ३, ओखलढुंगा २ र ताप्लेजुङमा १ मिलिमिटर वर्षा भएको थियो । उपत्यकामा शुक्रबार न्यूनतम तापक्रम ९ दशमलव ४ डिग्री सेल्सियस पुगेको थियो भने अधिकतम १४ डिग्री सेल्सियस पुगेको थियो । सधैं माइनसमा तापक्रम पुगेको जुम्लामा न्यूनतम १ दशमलव ५ थियो भने अधिकतम २ दशमलव ३ पुगेको थियो ।
प्रकाशित मिति: १५ माघ २०७३, शनिबार ०७:२९
