पाेखरा १२ माघ । नेकपा एमालेले आगामी निर्वाचनमा बहुमतसहित पहिलो पार्टी बन्ने उद्घोष गर्दै पार्टी कार्यक्रममा औपचारिकता त्याग्ने घोषणा गरेको छ । जनवर्गीय संगठनहरू आबद्ध मोर्चा संगठनले पोखरामा आयोजना गरेको तीन दिने राष्ट्रिय भेला तथा प्रशिक्षण कार्यक्रममार्फत एमालेले पार्टी कार्यक्रममा औपचारिकता त्याग्ने घोषणा गरेको हो ।
‘हामी औपचारिक कार्यक्रमहरूमा अनावश्यक तडकभडकलाई अन्त्य गर्ने प्रतिबद्धता व्यक्त गर्दछौं । अतिथिहरूलाई लगाइदिने ब्याच, माला र खादाको अत्यधिक प्रयोगबाट हाम्रा कार्यक्रमहरू भद्दा एवं खर्चिला भइरहेका छन् । हामी यस्ता परम्परा र मञ्चमा ठूलो संख्यामा अतिथिको भीड थुपार्ने र आसन ग्रहणमा मूल्यवान् समय खेर फाल्ने बोझिलो र खर्चिलो कार्यशैलीलाई सुधार गर्ने प्रतिबद्धता व्यक्त गर्दछौं,’ एमालेका २० वटै जनसंगठनको नाममा जारी गरिएको २० बुँदे घोषणापत्रको चौथो बुँदामा भनिएको छ, ‘हामीले अब प्रमुख अतिथि, सभाध्यक्ष र सीमित वक्तालाई मात्र मञ्चमा राख्ने, अरू सबै आमन्त्रित अतिथिहरूलाई दर्शकदीर्घामा नै राखी कार्यक्रम सञ्चालन गर्ने नयाँ संस्कारको विकास र अवलम्बन गर्नेछौं ।’ यस्तै, नेताहरूको सामाजिक प्रतिष्ठा, सम्मान र इज्जतको अझ अभिवृद्धि गर्दै सोहीअनुसार सम्मानजनक व्यवहार गर्न संवेदनशील रहेको जनाउँदै आगामी दिनमा नेताहरूलाई स्वागत गर्ने नाममा एयरपोर्ट र बसपार्कहरूमा अनावश्यक भीड जम्मा नगर्ने अर्को प्रतिबद्धता पनि गरिएको छ ।
नेताहरूलाई स्वागत गर्ने नाममा अनावश्यक भीड जम्मा गर्दै व्यक्तिगत रूपमा नजिकिने आधार खडा गर्ने, अनावश्यक सामीप्यता दर्शाउने र त्यसैलाई सम्मान तथा मर्यादा गरेको ठान्ने प्रवृत्तिलाई निरुत्साहित गर्नुपर्ने निचोड भेलाले निकालेको हो । अनावश्यक तडकभडक र भीडभाड गर्दै नेतालाई स्वागत गर्ने प्रवृत्तिका आधारमा व्यक्तिको पदोन्नति गर्ने गलत अभ्यासलाई रोक्न सबै जनसंगठन सहमत भएको घोषणापत्रमा उल्लेख छ । यसैगरी, सबै जनसंगठनहरू जातीय छुवाछूत, लैंगिक तथा सामाजिक विभेदपूर्ण व्यवहार र महिला हिंसा, साम्प्रदायिक विद्वेष बढाउने खालका अभिव्यक्ति तथा व्यवहारको समूल अन्त्य गर्न प्रतिबद्ध रहेको भन्दै त्यस्ता क्रियाकलापहरूलाई संगठनभित्र दण्डनीय विषय बनाउने घोषणा गरिएको छ ।
पार्टीभित्र अनुशासन कायम गराउँदै पहिलो शक्तिका रूपमा स्थापित हुनका लागि यस्तो निर्णय गरिएको मोर्चा संगठन प्रमुख तथा एमाले सचिव गोकर्ण विष्टले जानकारी दिए ।भेलाले नेपालको एक मात्र अन्तर्राष्ट्रिय विमानस्थलमा विदेशी एयर मार्सल राख्ने र कोड सेयरिङ गर्ने भन्ने समाचारप्रति गम्भीर ध्यानाकर्षण भएको जनाउँदै भेलाले अत्यन्त आपत्तिजनक कुरा भनेको छ । साथै, यसको सत्यतथ्य र सही जानकारी जनतासमक्ष स्पष्ट पार्न सरकारको ध्यानाकर्षण गराएको छ ।
यस्तै, भेलाले सबै छिमेकी तथा मित्रराष्ट्रहरूसँग घनिष्ठ र आपसी हितमा आधारित मित्रता बढाउन चाहेको जनाउँदै नेपालको भूमि कसैको हितविपरीत प्रयोग हुन नदिने प्रतिबद्धता पनि व्यक्त गरेको छ । ‘हामी सबैको संवेदनशीलताको कदर र सार्वभौमसत्ताको सम्मान गर्दछौं, हाम्रो आन्तरिक मामिलामा व्यक्त गरिने अनावश्यक चासो र हस्तक्षेप हामीलाई कहिल्यै स्वीकार्य हुनसक्दैन । त्यसैले, हाम्रा छिमेकी र मित्रराष्ट्रहरूले पनि हाम्रो संवेदनशीलता तथा सार्वभौमसत्ताको सम्मान गर्न सम्बद्ध सबैको हामी गम्भीर ध्यानाकर्षण गराउँदछौं,’ घोषणापत्रमा भनिएको छ । मोर्चासंगठनको भेलाले आगामी ७ माघ २०७४ भित्रमा तीनै तहको निर्वाचन गर्नुपर्नेमा जोड दिँदै निर्वाचनको मिति घोषणा र निर्वाचनसम्बन्धी आवश्यक कानुन निर्माण गर्न सरकारसँग माग गरेको छ । आउने दिनमा हुने तीनै तहको निर्वाचनमा एमालेलाई बहुमतसहितको पहिलो पार्टी बनाउन आफ्नो सम्पूर्ण शक्ति निर्वाचनमै परिचालन गर्ने उद्घोष पनि गरिएको छ ।
एमाले प्रचार विभाग प्रमुखसमेत रहेका सचिव योगेश भट्टराईले भेलाको अन्तिममा २० बुँदे घोषणापत्र प्रस्तुत गरेका थिए । सबै जनसंगठनबाट प्राप्त सुझावका आधारमा सो घोषणापत्र तयार पारिएको सचिव भट्टराईले जानकारी दिए । घोषणापत्रमा संविधान संशोधनका नाममा सरकारद्वारा पहाडी र मधेसीबीचको एकता कमजोर गर्दै जातजाति, समुदाय समुदाय एवं समाजिक सद्भाव भडकाउने कामको भत्र्सना गरिएको छ । ‘संविधान संशोधनको नाममा सरकारले सुरु गरेको तराईवासी–मधेसी र पहाडी समुदायबीच सामाजिक विद्वेष फैलाउने कार्यको हामी निन्दा र भत्र्सना गर्दछौं । संविधान संशोधनको राष्ट्रघाती प्रस्ताव तत्काल फिर्ता लिन जोडदार माग गर्दछौं । तराई–मधेस, पहाड र हिमाली क्षेत्रमा रहने सबै नेपाली तथा सबै जातजाति र समुदायहरूबीचको एकता र सामाजिक सद्भाव प्रवद्धनको पक्षमा दृढ प्रतिबद्धता व्यक्त गर्दछौं,’ घोषणापत्रमा भनिएको छ । भेलाले आगामी २१ फागुनदेखि एमालेले सुरु गर्ने मेची–महाकाली राष्ट्रिय अभियान सफल पार्न सक्रियताका साथ संलग्न हुने प्रतिबद्धता गरेको छ । त्यसका लागि विभिन्न जिल्लामा मोर्चा संगठनभित्रका जनसंगठनको प्रभावकारी समन्वय र परिचालनका लागि सबै संगठनलाई तोकेरै नेतृत्व गर्ने जिम्मेवारी दिइएको छ ।
यस्तै, जनसंगठनहरूबीच रहेको दोहोरो तथा तेहरो जिम्मेवारी यथाशीघ्र अन्त्य गरी वर्गीय संयुक्त मोर्चाको अवाधारणाअनुरूप सामाजिक रुपान्तरणमा सामूहिक रूपमा क्रियाशील हुने जनाइएको छ । पार्टीको केन्द्रीय कमिटीको सातौं बैठकद्वारा पारित आन्तरिक एकताका लागि गरिएको १० बुँदे विशेष प्रस्तावप्रति पूर्ण समर्थन जनाउँदै त्यसको मर्म र भावनाअनुरूप आ–आफ्ना संगठनमार्फत मुलुकको समृद्धिका लागि सामूहिक रूपमा अग्रसर हुने संकल्प घोषणापत्रमा गरिएको छ । यस्तै, आफ्ना अधिवेशनहरूमा सकेसम्म सर्वसम्मतिको अभ्यासलाई अनुसरण गर्नै प्रतिबद्धतासमेत जनाइएको छ । ‘कामका लागि नभई नामका लागि भद्दा कमिटी बनाउने र उपलब्ध सदस्यबीचको बैठक भन्दै सामूहिक निर्णय प्रणालीलाई ओझेलमा पार्दै मन परेकाबीचको निर्णय संगठनको निर्णयका रूपमा व्याख्या गर्ने गलत अभ्यासको हामी अन्त्य गर्नेछौं,’ घोषणापत्रमा भनिएको छ । सबै जनसंगठनहरूमा महिला, दलित, अल्पसंख्यक, तराईवासी–मधेसी, जनजाति, मुस्लिम, मजदुर, किसान, अपांगता भएका व्यक्ति र पिछडिएका क्षेत्रको संविधान, कानुन र पार्टी नीति एवं योजनाबमोजिम समावेशी प्रतिनिधित्व, नेतृत्व निर्माण र जिम्मेवारी प्रदान गर्दै समावेशीकरणलाई व्यवहारतः संस्थागत गर्ने प्रतिबद्धता पनि भेलाले गरेको छ । एमालेले अघि सारेको तीनखम्बे अर्थनीति अवलम्बन गर्दै सवल र आत्मनिर्भर अर्थतन्त्रसमेत समाजवादी दिशामा अघि बढ्न प्रतिबद्ध हुने घोषणा पनि गरिएको छ ।
यस्तै, भेलाले विश्वभर चलिरहेका राष्ट्रिय स्वतन्त्रता, स्वाधीनता, सामाजिक न्यायको पक्षमा तथा वर्णभेद, रंगभेद, जातिभेदविरुद्धका न्यायोचित एवं शान्तिपूर्ण आन्दोलनहरूप्रति ऐक्यबद्धता व्यक्त गर्दै जलवायु अनुकूलन, वातावरणीय न्याय र दिगो विकास लक्ष्य हासिल गर्न आ–आफ्ना संगठनहरूमार्फत र सामूहिक रूपमा समेत सार्थक योगदान गर्ने प्रतिबद्धता जनाइएको छ । भेलामा विभिन्न २० संगठनका इन्चार्ज, सह–इन्चार्ज, अध्यक्षसहित केन्द्रीय पदाधिकारी गरी ४ सयभन्दा बढीको सहभागिता थियो । भेलाको उद्घाटन एमाले अध्यक्ष एवं पूर्वप्रधानमन्त्री केपी शर्मा ओलीले गरेका थिए । भेलामा पार्टीका वरिष्ठ नेता एवं पूर्वप्रधानमन्त्रीद्वय झलनाथ खनाल र माधवकुमार नेपाल, उपाध्यक्ष वामदेव गौतम, महासचिव ईश्वर पोख्रेल, संसदीय दलका उपनेता सुवाषचन्द्र नेम्वाङसहित शीर्ष नेताले प्रशिक्षण दिएका थिए ।
प्रकाशित मिति: १२ माघ २०७३, बुधबार ०८:०३
