इनरुवा, ६ माघ । सुनसरी कप्तानगन्ज–२ की शोभाकुमारी मेहतालाई गाविसमा एक वर्षमा कति बजेट आउँछ र कहाँ खर्च हुन्छ भने केही थाहा थिएन । तर अहिले उनलाइ सबै कुरा थाहा भइसकेको छ । कारण एउटै हो– सामुदायिक विकास परियोजनाबाट प्राप्त गरेको तालिम ।
मेहता त एउटा गाविसका लागि उदाहरणका पात्र मात्र हुन्। उनी जस्तै जिल्लामा अन्य गाविसका महिलालाई सुनसरी सदरमुकाम इनरुवामा रहेको सामुदायिक विकास कार्यक्रम (सिडिपी)ले तालिम दिएपछि सबै गाविसमा आउने बजेट खर्च हुने विषयमा जानकार भइसकेका छन् ।
सिडिपीले सुनसरी सदरमुकाम इनरुवासहित जिल्लाका विभिन्न ठाउँमा १० समूहमा दुई सय ५५ जना महिलालाई चारदिन तालिम दिएपछि महिलाले सबै कुरा थाहा पाउन थाल्नुभएको छ । संस्थाले सुनसरीको हरिपुर, मधुवन, प्रकाशपुर, लौकही, श्रीपुरजब्दी लगायतका गाविसमा महिलाको भेला गराई विभिन्न समूह गठन गरेर विकासमा पहुँच पुर्याउनका लागि विभिन्न किसिमको कार्यक्रम गर्दै आएको छ ।
सोही कार्यक्रमअन्तर्गत सिडिपीले जिल्लाको १५ वटा गाविसमा महिलालाई एकत्रित गरेर गाविसमा आउने बजेट र खर्च हुने बजेटको विषयमा प्रशिक्षण दिएपछि अहिले महिलाले आफ्नो अधिकार खोज्न र आफूहरुका लागि आएको बजेट कहाँ खर्च भइरहेको छ भने विषयमा चासो राख्न थालेको सिडिपीकी सहजकर्ता पवित्रा कार्कीले बताइन् ।
जिल्लाका महिलालाई जागरुक बनाउँदै पछाडि परेको समुदायलाई विकास निर्माण र अफ्नो अधिकार खोजी गर्नका लागि सक्षम बनाउने आफूहरुको उद्देश्य रहेको सिडिपी सुनसरीका कार्यक्रम संयोजक सरस्वती कोइरालाले बताइन् ।
यसरी गैरसरकारी संस्थाप्रति विभिन्न किसिमका टीकाटिप्पणी भइरहेको बेला सिडिपीले गरेका कामले स्थानीयवासी खुसीसमेत भएका छन् । सिडिपी जस्तै अन्य गैरसरकारी संस्थाले कार्यक्रम तथा काम गर्यो भने पक्कै पनि गाविसमा रहेका अशिक्षित व्यक्तिलाई शिक्षित तुल्याएर आफ्नो अधिकार खोज्ने सवालमा कोही पनि पछि नपर्ने स्पष्ट छ । रासस
