काठमाडौं । मुलुकमा पछिल्लो समय तस्करी धमाधम पक्राउ परिरहेका छन् । तस्करले नेपाललाई सुरक्षित मानेर हो वा सहज मानेर हो तस्करीको मुख्य ट्रन्जिट बनाएका छन् । प्रहरीको सक्रियतामा दुई सातामै ४६ किलो सुन र करोडौं विदेशी मुद्रासहित तस्करमा संलग्न पक्राउ परेका छन् । प्रहरीले नेपाली तस्करसँगै विदेशीलाई समेत पक्राउ गर्न सफल भएको छ ।
साथमा तस्करहरूबाट आधुनिक गाडी पनि बरामद गरेको छ । प्रहरीले तस्करहरूलाई राजधानीका विभिन्न क्षेत्रबाट पक्राउ गर्न सफल भएको हो । दुई साताअघि मात्रै विमानस्थलबाट ३४ किलो सुनसहित तस्कर पक्राउ परेको घटना सार्वजनिक भएको थियो भने माघे संक्रान्तिकै दिन १५ किलो सुन र करोडौंको विदेशी मुद्रासहित ३ चिनियाँ कारोबारी पक्राउ परेका छन् ।
सुन तस्कर प्रहरी फन्दामा परे पनि मुख्य मालिक भने अझै फेला पर्न सकेको छैन । यस्तै माघ १ मा करोडौं विदेशी मुद्रासहित पक्राउ परेका तीन चिनियाँ नागरिकसहित एक नेपाली तस्करले आफ्नो गिरोहका सम्बन्धमा मुख खोलेका छैनन् । महानगरीय अपराध महाशाखाले राजस्व छलेर विदेशी मुद्रा विदेश लैजान आँटेका तीन चिनियाँ र एक नेपालीलाई शनिबार (माघ १ गते) बिहान २ बजे काठमाडौंको नागढुंगाबाट पक्राउ परेका हुन् । बा.१य १२३२ को हरियो नम्बर प्लेटको पर्यटक बोक्ने स्कारपियोमा उनीहरू सवार थिए ।
प्रहरीले पक्राउ परेका विदेशी नागरिकको साथबाट २ लाख ७० हजार ६ सय एक अमेरिकन डलर, १ लाख ३२ हजार ४ सय ५० युरोपियन डलर, ४ हजार ६ सय ५० अस्ट्रेलियन डलर, २ हजार ४ सय क्यानेडियन डलर, २१ लाख ४७ हजार ३ सय जापानी येन, ३ हजार २ सय ७० चाइनिज युयान, २ हजार स्वीस फ्र्यांक बरामद गरेको छ । महाशाखाका अनुसार बरामद विदेशी मुद्राको नेपाली सटही रकम करिब ४ करोड ७१ लाख १३ हजार ७ सय ९० रुपैयाँ हुन्छ ।
प्रहरीले यो घटनालाई सुन तस्करीसँग जोडेर अनुसन्धान थालेको छ । महाशाखा प्रमुख एसएसपी सर्वेन्द्र खनालका अनुसार अवैध मुद्राको प्रयोग सुन तस्करी, लागूऔषध वा अन्य अवैध काममा प्रयोग गर्न लागिएको हुन सक्ने बताउँछन् ।
गत साता ३५ किलो सुनसहित पक्राउ परेका सन्तोष काफ्लेले पक्राउ गर्न खटिएका प्रहरीमाथि नक्कली पेस्तोल देखाएर भाग्न खोजेको समाचार बाहिर आएको थियो । उनले नक्कली चाइनिज पेस्तोल देखाएर प्रहरीमाथि फायर गर्न खोजेका थिए । काफ्लेसँगै दिलबहादुर थापा पनि पक्राउ परेका छन् । यसरी मुद्रा होस् चाहे सुन तथा लागूऔषध नै किन नहोस् नेपाल तस्करको मुख्य ट्रान्जिट बनेको छ ।
सीआईबी प्रवक्ता एसएसपी मीरा चौधरीका अनुसार काफ्ले र थापाले आफ्नो गाडीमा सधैं नक्कली पेस्तोल लिएर हिँड्ने गरेका थिए । विमानस्थलबाट सुन ओसार्न भने बाँकेका गोपालबहादुर शाही भरिया बनेका थिए ।
विमानस्थलबाट बाहिरिएको करिब ३४ किलो सुन समातिएको दुई साता पनि नबित्दै काठमाडौं १६, चमतीबाट १५ किलो अवैध सुन बरामद भएको हो । रसुवाको केरुङ नाका हुँदै काठमाडौं ल्याइएको सुन सुराकीका आधारमा महानगरीय प्रहरी परिसर काठमाडौंको बालाजु वृत्तले शनिबार (माघ १मा) बरामद गरेको हो ।
यस्तै पुस १३ मा पनि महानगरीय अपराध महाशाखाले रसुवाको केरुङ हुँदै काठमाडौं भित्र्याउन लागेको ७ किलो सुन थानकोटबाट बरामद गरेको थियो ।
अवैध सुन बरामदका प्रत्येक घटनामा चालक मात्रै पक्राउ पर्ने र असली मालिकसम्म अनुसन्धान नपुग्ने भएकैले परिसरले यो घटनामा संगठित अपराध कसुर ऐनअन्तर्गत मुद्दा चलाउने भएको छ । अवैध सुनका मालिक फेला नपर्ने घटना नयाँ भने होइन ।
विमानस्थलबाट बाहिरिन लागेको ३४ किलो सुनका तस्करको बयानका आधारमा प्रहरीले विमानस्थलको भन्सारमा कार्यरत भन्सार अधिकृत श्रीनारायण यादव र राजकुमार ढकाललाई पक्राउ गरेको छ । विमानस्थल भन्सार स्रोतका अनुसार ८ वर्षभन्दा लामो समयदेखि विमानस्थलमा कार्यरत यादव तथ्यांक अधिकृत हुन् भने प्राविधिक कर्मचारी ढकाल करारमा नियुक्त हुन् ।
यस्तै पुसको पहिलो साता रसुवाको टिमुरेबाट मोटरसाइकलमा लुकाएर ल्याइँदै गरेको ५ किलो सुन बरामद भएको थियो । पक्राउ परेका विरेन लामाले उक्त सुन केरुङ नाका हुँदै ल्याएको बताएका थिए ।
यस्तै सुन, विदेशी मुद्रासँगै लागूऔषधको तस्कर गर्नेको संख्या पनि नेपालमा व्यप्त छ । प्रहरी तथा लागूऔषध नियन्त्रण ब्युरोले ठूलो परिमाणमा लागूऔषधका स्वदेशी तथा विदेशी तस्करलाई समात्न सफल भएका छन् । यसमा पनि बिचौलिया अर्थात् भरिया पक्राउ पर्ने गरे पनि मुख्य मालिकको अत्तोपत्तो लाग्दैन ।
प्रकाशित मिति: २ माघ २०७३, आईतवार १७:०६
