इलाम, १ माघ । नेपाल प्रगतिशील लेखक सङ्घको शुक्रबार सम्पन्न दोस्रो जिल्ला सम्मेलनले डा देवी क्षेत्री दुलालका अध्यक्षतामा १५ सदस्यीय नयाँ कार्यसमिति चयन गरेको छ ।
सङ्घका उपाध्यक्षमा होम खतिवडा, सचिवमा दिवाकर भण्डारी र कोषाध्यक्षमा इच्छाराम कट्टेल तथा सदस्यमा यादव अधिकारी, लता पौडेल, सुशीला रिसाल, इन्द्रनारायण सुवेदी, टीका घिमिरे, प्रकाशचन्द्र खनाल, कृष्णप्रसाद रिजाल, बालकृष्ण लामिछाने, उमेश गौतम, विना अधिकारी र सुमन लुहागुन चयन भएको सचिव भण्डारीले जानकारी दिए ।
सङ्घको पहिलो सम्मेलन २०५८ सालमा भएको थियो ।
सम्मेलनमा सहभागी लेखकले प्रगतिवादी लेखनमा पुरानो पुस्ताको योगदान प्रभावकारी रहे पनि नयाँ पुस्तामा यो जाँगर कमै मात्र देखिएको बताउँदै समय र परिवेशअनुसार लेखनको विषयवस्तु तथा शैली पनि परिमार्जन गर्दै लैजानुपर्ने औँल्याए ।
कार्यक्रममा मोहन पाण्डेद्वारा लिखित ‘पहाडी दियालो’ गीतिसङ्ग्रह विमोचन गरिएको थियो ।
रासस
