काठमाडौँ, २२ पुस । साहित्यकार गोविन्द नेपाली (दिनदुःखी)लाई तुलसी चन्द्र स्मृति पुरस्कारबाट सम्मानित गरिएको छ ।
तुलसी चन्द्र स्मृति प्रतिष्ठानद्वारा आज यहाँ आयोजित कार्यक्रममा शताब्दी पुरुष सत्यमोहन जोशी र राष्ट्रिय मानवअधिकार आयोगका अध्यक्ष अनुपराज शर्माले संयुक्त रुपमा उहाँलाई सो पुरस्कार प्रदान गरे । पुरस्कारको राशी रु. १५ हजार रहेको छ । नेपालीलाई ‘पचहत्तरकै चिनारी’ नामक कविता सङ्ग्रह गरे वापत सो पुरस्कार प्रदान गरिएको हो ।
साहित्यकार हेमराज पाण्डेद्वारा प्राप्त गरेको लेखकीय पारिश्रमिक, पुरस्कार र पुस्तक बिक्रीबाट प्राप्त गरेको रकमबाट आफ्ना हजुरबुबा तुलसीराम पाण्डे र हजुरआमा चन्द्रकला पाण्डेको स्मृतिमा पहिलोपटक उक्त पुरस्कार प्रदान गरिएको आयोजकले जनाएको छ ।
सो अवसरमा शताब्दी पुरुष जोशीले साहित्यका नेपालीले ७५ वटै जिल्लाको परिचयात्मक विवरणलाई फूलको मालामा उनेर कवितामार्फत जनतामाझ पुर्याउनु नयाँ कीर्तिमान भएको विचार व्यक्त गरे ।
उनले नेपाली राष्ट्रियता झल्कने खालको खोजमूलक पुस्तकको आवश्यकता भएको बताउँदै केही मात्रामा प्रकाशित भए तापनि त्यो पूर्ण नभएको टिप्पणी गरे ।
त्यस्तै राष्ट्रिय मानवअधिकार आयोगका अध्यक्ष शर्माले प्रत्येक जात जाति, भाषा संस्कृतिको इतिहास खोज्नुपर्ने भनाइ व्यक्त गरे । त्यसैगरी सम्मानित साहित्यकार नेपालीले यस किसिमको सम्मानले आफूलाई हौसला प्राप्त गर्नुका साथै थप कृति प्रकाशन गर्न उत्प्रेरणा मिल्ने विचार व्यक्त गरे ।
जुम्लामा जन्मिएका नेपालीले ‘पचहत्तरकै चिनारी’ कविता सङ्ग्रहमा ७५ जिल्लाका इतिहास, भूगोल, किंवदन्ती, स्रोत सम्पदा, संस्कृति रहन–सहनलाई कवितामार्फत प्रस्तुत गरेका छन् । उनले हालसम्म चौधवटा कृति प्रकाशित गरेका छन् । रासस
