काठमाडौँ, ९ पुस । भौतिक पूर्वाधार तथा यातायात मन्त्री रमेश लेखकले संविधान संशोधन प्रस्तावलाई संसदीय प्रक्रिया मार्फत टुङ्गो लगाउनुको विकल्प नरहेको बताएका छन् ।
मन्त्री लेखकले सधँैैजसो संसद् अवरूद्ध गर्नेभन्दा पनि यदी संविधान संशोधन गलत छ वा जनताको पक्षमा छैन भने पनि लोकतान्त्रिक प्रक्रियामार्फत संसद्बाटै टुङ्गो लगाउनुपर्नेमा जोड दिए ।
रिपोटर्स् क्लबद्वारा यहाँ आज आयोजित साक्षात्कारमा मन्त्री लेखकले भने–“संविधान संशोधन गर्नेबारे दलहरूबीच पहिले नै सहमति भएको हो, हिजोसम्म सहमति ठिक, आज बेकिठ भन्ने हुँदैन, त्यसैले यसलाई सबै मिलेर प्रक्रियामा अगाडि बढाउनुपर्छ ।”
जतिसक्दो चाँडो संविधान संशोधन गरी त्यसलाई सर्वस्वीकार्य बनाउँदै कार्यान्वयन गरी तीनवटै निर्वाचन सम्पन्न गर्दे मुलुकलाई आर्थिक, सामाजिक र साँस्कृतिक विकासको बाटोमा अगाडि बडाउनुपर्ने उनको भनाइ छ ।
सो अवसरमा मन्त्री लेखकले सवारी चालक अनुमतिपत्रलाई थप व्यवस्थित गर्न सोमबारबाट अनलाइनबाटै फर्म भर्ने प्रक्रिया सुरु गरिने जानकारी दिँदै त्यस सेवालाई देशभरी सञ्चालन गरिने बताए ।
आफ्नो मन्त्रालयले हुलाकी सडक, द्रूतमार्ग र रेल यातायात मार्गलगायत भौतिक पूर्वाधारसँग सम्बन्धित काम द्रूतगतिमा अगाडि बढेको मन्त्री लेखकको भनाइ छ । “राजनीतिक विषयमा पनि मन्त्री परिषद्मा छलफल हुने भएकोले पूर्व राजा ज्ञानेन्द्र शाहले दिएको विज्ञप्तिको बारेमा छलफल भएको हो, तर निणर्य भएको छैन”–उनले भने ।
रासस
