कालीकोट, ७ पुस । कुमालगाउँ–५ का जगदिश उपाध्यायले जिल्ला प्राविधिक कार्यालय कालीकोटमा दुई दिन पुरै धाएपछि मात्र खानेपानी मर्मतको योजना सम्झौता गर्न भ्याएका छन् । जिल्ला विकास समिति अन्तगर्तको बजेटमा गाउँको खानेपानी मर्मत कार्य योजनामा परेपछि उपभोक्ता समिति गठन गरी योजना सम्झौता गर्न जिविस कार्यालय पुगेका उपाध्यायलाई दुई दिनपछि सम्झौता गर्ने साइत जुरेको हो ।
अघिल्ला वर्षहरुमा बैशाख जेठतिर मात्र योजना सम्झौताका लागि तात्ने उपभोक्ता समितिहरु यो वर्ष भने पुसको सुरुवातमा नै जिविसमा धाउन थालेका छन् । ‘बैशाखसम्म योजना सम्झौता होला भन्ने मै थियाै खानेपानी उपभोक्ता समिति कुमालगाउँका अध्यक्ष जयमणी भट्टराईले भने, ‘सधै झै जेठ बैशाख काम होला भनेको त यो वर्ष छिट्टै भए समयमै काम सकिनेमा आशा लागेको छ ।’
सधै जसो जिल्ला परिषद् सकिएपछि योजना सम्झौता गर्ने जिल्ला विकास समिति कालीकोटले चालु आर्थिक वर्षको पुस मसान्तसम्म छनौट भएका योजना सम्झौता गरिसक्नु पर्ने निर्णय गरेपछि मंसिर पुसमा सुनसान जस्तै देखिने जिल्ला विकास समितिमा उपभोक्ताको भिड बाक्लिएको छ भने जिविसका कर्मचारीहरुलाई पनि भ्याइ नभ्याइ हुने गरेको छ ।
हरेक वर्ष फागुनमा जिल्ला परिषद् गर्ने जिल्ला विकास समितिले योजनाको कार्य सञ्चालनको लागि पनि परिषद् नै कुर्ने गरेको छ । अर्को परिषद् नभइ योजना सम्झौता हुँदैन भन्ने ठानेका उपभोक्ता समितिहरु पनि गाउँको कामका लागि जुर्मुराएका छन् । जिल्लाका अधिकांश विकास आयोजनाहरुमा ‘असारे विकास’ को चर्चा हुन नदिन यो वर्ष सबै योजनाहरु समयमै सम्पन्न गरी बजेट फ्रिज हुन नदिने गरी काम थालिएको स्थानीय विकास अधिकारी प्रदीपराज अधिकारीले बताए ।
जेठ मसान्तमा लाग्ने गरेकाे भीड पुसमै लाग्यो : प्राविधिक कार्यालयमा योजना सम्झौता गर्न आएका उपभोक्ताहरुको भिड ।
परम्परागत काम गर्ने शैलीले कालीकोटको विकास बजेट खर्च हुन नसकेको भन्दै स्थानीय विकास अधिकारीले भने, ‘चैत्र मसान्तसम्म सबै योजनाको बजेट खर्च गर्न सके थप बजेट विनियोजन गर्ने आश्वासन मन्त्रालयबाट पाएकोले सो अनुसार नै काम गरिरहेको छु ।’ परिषद् पछि मात्र योजनाको काम शुरु गर्दा केही समय उपभोक्ता समिति गठनमै बित्ने र सहमति नभए उपभोक्ता समितिमा विवाद सिर्जना भई सम्झौता नै ढिला हुँदा विकास कार्य अवरोध भएको स्मरण गर्दै यो वर्ष त्यसो हुन नदिन योजना सम्झौता शुरु गरिएको उनको भनाई छ ।
जिल्लामा सञ्चालित विभिन्न आयोजना अन्तर्गतका विकास निर्माणका कार्यहरु भइ सकेको स्थानीय विकास अधिकारीले बताए । कालीकोटका लागि सबै भन्दा महत्वपूर्ण मानिएको कर्णाली रोजगार कार्यक्रममा यो वर्ष ३७ वटा योजनाका लागि करिब ११ करोड बजेट स्वीकृति भइ आइसकेकोले कामदारको छनौट प्रक्रियाका लागि जिविसको टोली गाउँमा पठाइ सकिएको बताइएको छ ।
साना सिंचाइ परियोजना अन्तर्गत कालीकोटका तीस वटै गाउँ विकास समितिबाट कम्तीमा दुई/दुई वटा योजना छनौट भइ स्वीकृतिका लागि मन्त्रालयमा पठाइसकिएको, ३ करोड रुपैयाँ बजेटको निर्वाचन क्षेत्र पूर्वाधार विशेष कार्यक्रम र १ करोड रुपैयाँको निर्वाचन क्षेत्र विकास कार्यक्रमका लागि योजना छनौट गरी सम्झौता गर्न सम्बन्धित गाउँ विकास समितिलाई पत्राचार गरिसकिएको, संस्कृति पर्यटन पूर्वाधार तर्फ ९० लाख बराबरका ५० योजना सञ्चालनका लागि प्रक्रिया शुरु गरिएको र १० वटा योजनाको सम्झौता समेत सम्पन्न गरी काम थालिएको उनले बताए ।
योजना सम्झौता गर्दा उपभोक्ता समितिमै विवाद गर्ने र जेठ मसान्तमा आएर योजना सम्झौता गर्ने हुनाले जिल्लाका धेरै जसो विकास योजनाहरु सम्पन्न नहुँदै बजेट फ्रिज जान थालेपछि पुस मसान्तसम्म सम्झौता गरी सक्न सूचना गरेको हो । जिल्ला विकास समितिले थालेको यो कार्यले कालीकोटका उपभोक्तामा केही विकासको आशाको सञ्चार भएको बताएका छन् ।
प्रकाशित मिति: ७ पुष २०७३, बिहीबार ०८:१५
