काठमाडौं, ४ पुस । सिन्धुलीको रत्नावती गाविसस्थित सुनकोसी नदीमा जिप खसेर मृत्यु हुनेको संख्या ७ पुगेको छ । काठमाडौंबाट हलेसी जाँदै गरेको बा.१२च ८८९७ नम्बरको जिप सुनकोसीमा खसेको थियो ।
तीव्र गतिका कारण दुर्घटना भएको प्रहरीको प्रारम्भिक अनुसन्धानमा देखिएको छ । दुर्घटनामा एकजना घाइते भएका छन् भने एकजना बेपत्ता छन् । जिपमा ९ जना सवार थिए ।
दुर्घटनामा मृत्यु हुनेमा लमजुङ सानिभन्ज्याङ गाडी चालक झपटबहादुर गुरुङ, सिन्धुपाल्चोक फुल्पिङकट्टीका साङगदोर्जे शेर्पा, बाले शेर्पा,
बिवुती शेर्पा, सर्किनी शेर्पा छन् । यस्तै मृत्यु हुने अन्यमा काठमाडौं स्वयम्भु गोल्ढुङकी टुकुली शेर्पा र परिचय खुल्न नसकेका १ जनाको मृत्यु भएको जिल्ला प्रहरी कार्यालय सिन्धुलीले जनाएको छ ।
घाइते हुनेमा सिन्धुपाल्चोक फुल्पिङकट्टी, ६ का ५० वर्षीय दाल्मु शेर्पा छन् । उनलाई उपचारका लागि काठमाडौं ल्याइएको छ । यस्तै बेपत्ता हुनेमा सिन्धुपाल्चोक फुल्पिङकट्टी, ६ कै ४५ वर्षीय दानुर्बु शेर्पा रहेको प्रहरीले जनाएको छ ।
प्रकाशित मिति: ४ पुष २०७३, सोमबार ११:०६
