काठमाडौं ३ पुस । नेपाली कांग्रेसका जिल्ला कोषाध्यक्षहरूको पहिलो राष्ट्रिय सम्मेलन काठमाडौंमा हुने भएको छ । कांग्रेसका संस्थापक एवं पूर्वप्रधानमन्त्री स्वर्गीय कृष्णप्रसाद भट्टराईको ९३ औँ जन्मजयन्तीको सन्दर्भ पारेर पुस ८ र ९ गते काठमाडौंमा सम्मेलन हुन लागेको हो ।
सम्मेलनका संयोजक एवं काठमाडौं कांग्रेसका कोषाध्यक्ष गोविन्द पुडासैनीका अनुसार सम्मेलनमा जिल्लामा स्रोत व्यवस्थापनको अवस्था, कोष सञ्चालन लगायतका विषयमा छलफल हुनेछ । त्यस्तै संगठन सुदृढीकरण एवं आसन्न निर्वाचनकेन्द्रित अभियानका बारेमा पनि सम्मेलनले निर्णय लिने पुडासैनीले जानकारी दिए ।
‘पहिलोपटक कोषाध्यक्षहरूको सम्मेलन हुन लागेको हो । यसले पार्टी सञ्चालनमा स्रोत व्यवस्थापन, पारदर्शितादेखि समग्र पार्टी जीवनबारे महत्वपूर्ण निर्णय लिनेछ’, पुडासैनीले भने । सम्मेलनका क्रममा कोषाध्यक्षहरूले जिल्लामा पार्टी सञ्चालनमा परेका समस्याबारे पार्टी नेतृत्वलाई अवगतसमेत गराउनेछन् ।
भेलामा स्थानीय निकाय निर्वाचन, स्थानीय तह पुनःसंरचना तथा पार्टीको भावी रणनीतिबारे पनि महत्वपूर्ण छलफल हुनेछ । सम्मेलनको कांग्रेस सभापति शेरबहादुर देउवाले पुस ८ गते राष्ट्रिय सभा गृहमा उद्घाटन गर्नेछन् ।
सम्मेलनमा पार्टी सदस्यता शुल्क, शुल्क उठाउने कार्यविधि, कार्यक्रम सञ्चालनका लागि स्रोत व्यवस्थापन, केन्द्रीय समितिबाट उपलब्ध हुने सहयोग लगायतका विषयमा पनि छलफल हुने जनाइएको छ । कांग्र्रेसका जिल्ला कोषाध्यक्षहरूले सांसदहरूबाट जिल्ला समितिले लेबी प्राप्त गर्ने व्यवस्था गर्नुपर्ने माग गर्दै आइरहेका छन् ।
कांग्रेसले पछिल्लो समय निर्वाचनकेन्द्रित कार्यक्रम र अभियानलाई तिव्रता दिएको पृष्ठभूमिमा जिल्ला कोषाध्यक्षहरूको सम्मेलन हुन लागेको हो । यसअघि कांग्रेसले स्थानीय तहको पुनःसंरचनाबारे जिल्ला सभापतिहरूको भेला गरेर धारणा तय गरिसकेको खबर आजको हिमालय टाइम्समा छ ।
प्रकाशित मिति: ३ पुष २०७३, आईतवार ०७:१५
