पाल्पा, २ पुस । शिक्षा, स्वास्थ्य, कृषि, सञ्चार, ‘पर्यटन र उद्योग विकासको पूर्वाधार रामपुर क्षेत्रको विकासको आधार’ भन्ने नाराका साथ प्रथम रामपुर महोत्सव तथा व्यापार मेला २०७३ हुने भएको छ ।
रामपुर उद्योग वाणिज्य सङ्घको आयोजनामा हुन लागेको सो प्रथम रामपुर महोत्सव यही आउँदो पुष २७ देखि माघ ८ गतेसम्म सञ्चालन हुनेछ । महोत्सवमा १० करोड बराबरको कारोबार गर्ने, दुई लाख बराबर दर्शक भित्र्याउने लक्ष्य रहेको रामपुर उद्योग वाणिज्य सङ्घका अध्यक्ष भोजेन्द्रप्रकाश ढकालले बताए ।
महोत्सवमा अटो मोबाइल्स र होटल रेस्टुरेन्ट बाहेक २०० वटा स्टल रहनेछन् । कृषिजन्य वस्तुको प्रवद्र्धन र रामपुर क्षेत्रको व्यापार व्यवसाय बढाउने उद्देश्यले महोत्सव आयोजना गरिएको अध्यक्ष ढकालले बताए ।
डोको बुनेर मासिक २५ हजार बराबरको आम्दानी
रामपुर नगरपालिका– १० किसानबारीका ६९ वर्षिय विष्णु विक लाई डोको नबुनेसम्म साँझ बिहान हातमुख जोर्ने समस्या छ । विकले विगत ४० वर्षदेखि यस व्यवसायलाई निरन्तरता दिँदै अाएका छन् ।
गाउँघरमा प्रयोग हुने डोको, थुम्से र भकारी बुनेर घर घरमा बिक्रीका लागि उनी पुग्छन् । दिनमा पाँचवटा डोको बुनेर मासिक रु. २५ हजार आम्दानी हुने गरेको विकले बताए ।
रामपुर क्षेत्रमै व्यवसायिक रुपमा उनले मात्र यस पेशालाई निरन्तरता दिएका छन् । रु. दुई सय देखि तीन सम्ममा एउटा बाँस किनेर उनले डोको बुन्दै आएका हुन् ।
उनी भन्छन्,“कमाउने कोही छैन, सम्पत्तिको नाममा हातमा डोको बुन्ने सीप मात्र छ” उनले भने —“डोको बुनेर नै छोराछोरीको पढाइखर्च, घरव्यवहार चलाएको छु ।” एउटा डोको रु २५० देखि रु ३५० सम्ममा बिक्री हुने गर्दछ ।
आधुनिकतासंगै पछिल्लो समय थुम्से र भकारीको माग अत्यन्त न्यून हुने गरे पनि डोकोको माग भने अत्यधिक हुने गरेकाले पुर्याउन मुस्किल परेको विक बताउछन् । “पहिले नै अर्डर हुन्छ, बुनेर सिध्याउन नपाउँदै बिक्री भइहाल्छ” उनले भने। हातमा सीप भयो भने बाँच्न गाह«ो नपर्ने उनको अनुभव छ । रासस
