रसुवा, २ पुस । पासाङल्हामु राजमार्गले छोएको सडकको दायरा कम गर्न नेपाली काँग्रेसले आग्रह गरेको छ ।
काँग्रेस रसुवाका सभापति पेम्बाछिरिङ तामाङका अनुसार पासाङल्हामु राजमार्गअन्तर्गत बेत्रावतीदेखि रसुवागढीसम्म ७० किमी सडक क्षेत्रको दायाँबायाँ १५-१५ मिको दायरा सरकारले तोकी खरिद बिक्रीमा रोक लगाइरहेको र स्याफ्रुबेँसीदेखि मैलुङ हुँदै गल्छीतर्फका क्षेत्रबाट राजमार्ग घोषणा भई निर्माण अगाडि बढिरहेकाले सहायक मार्गका रुपमा रहने सो मार्गको दायरा घटाइदिन आग्रह गरिएको हो ।
तीन वर्षदेखि सडकको दायाँबायाँ जग्गा कारोबारमा रोक लगाउँदा आफ्नो स्वामित्वको सम्पत्ति बिक्री गर्न, भूकम्पपछिको अनुदान रकमबाट घर निर्माण गर्न, बैंक–वित्तीय संस्थामा धितो बन्धक राखी घर व्यवहार मिलाउन ठूलो समस्या परिरहेकाले तराईको मापदण्ड सरह दायरा हिमाली क्षेत्रमा उपयुक्त नहुने काँग्रेसले जनाएको छ ।
यस्तै राजमार्ग अहोरात्र खुला गरी सवारीसाधन परीक्षणका लागि बेत्रावती, धुन्चे एवम् रसुवागढीमा मात्र परीक्षणस्थल राखिनुपर्ने र सशस्त्र प्रहरी बलले सीमा क्षेत्र मात्र हेर्ने भएकाले धुन्चेमा रहेको सशस्त्र जाँचचौकी रसुवागढीमा सार्नुपर्ने माग काँग्रेसले राखेको सो दलका सभापति तामाङले बताए । रासस
