अछाम, २ पुस । अछाम कालिकास्थानका सुरज विष्टलाई कर्णाली नदी पार गर्दा ज्यान जोखिममा पर्ला कि भन्ने अब डर छैन् । पुलको अभावमा जोखिमपूर्ण अवस्थामा डुंगाबाट नदी पार गर्ने स्थानमा पक्की पुल बनेपछि उनी मात्र होइन, अछामका पूर्वी भेगका सर्वसाधाराणलाई यात्रा गर्न सहज भएको छ ।
कर्णाली नदीमा पुल नहुँदा डुंगाबाट वारपार गर्दा ज्यान समेत जाने गरेको सम्झिदै अछाम कालिकास्थानका विष्टले भने, ‘पुलले गर्दा यस क्षेत्र जनताले नयाँ आयाम भएको महसुस गरेको छौं ।’ उनले कर्णाली नदीमा बनेको दोस्रो पुलले मध्यपश्चिम र सुदूरपश्चिमलाई निकै नजिक ल्याएको बताए ।
झण्डै सात वर्ष अघि निर्माण गर्न शुरु गरिएको दैलेखको राकम स्थित कर्णाली नदी पुलको निर्माणको काम पुरा भएपछि सुरज जस्ता अछामका जनताको गाडी चढ्ने पनि सपना पुरा भएको छ ।
कर्णाली चिसापानी देखि अछामका वेलखेतसम्मको भुभागमा बनेको कर्णाली नदीको दोस्रो पुलले सुदूरपश्चिम क्षेत्रका बासिन्दाले धेरै सुविधा पाउने भएको स्थानीयको भनाई छ ।
कर्णाली नदी वर्षामा डुंगा नचल्ने भएकाले अछामबाट दैलेख जान लामो यात्रा तय गर्ने पर्ने अवस्थालाई कर्णाली नदीमा बनेको पुलले छोट्याइ दिएकोमा स्थानीय हर्षित छन् ।
यातायात सेवाबाट बञ्चित भएका अछामका पूर्वी क्षेत्रका बासिन्दालाई पुलले सहज बनाएको छ । पुल नहुँदा सुत्केरी महिलाहरुले उपचार नपाएर अकालमा मृत्यु हुने गरेको अछाम कालिकास्थानकी जमुना विष्टले बताइन । ‘सुत्केरी महिलालाई उपचार लैैजान निकै समस्या हुने गरेको थियो’ उनले भनिन्, ‘अहिले पुल भएपछि गाउँमै एम्वुलेन्स आउने भएको छ ।’
६ नम्बर र ७ नम्बर प्रदेशलाई जोड्न कर्णाली नदीमा बनेको दोस्रो पुल सञ्चालनमा आएपछि सुदूरपश्चिम र मध्यपश्चिम क्षेत्रका बासिन्दा लाभान्वित भएका छन् ।
आर्थिक वर्ष २०६४/६५ बाट निर्माण थालि अहिले सम्पन्न भएको पुलको भौतिक पूर्वाधार तथा यातायात मन्त्री रमेश लेखकले शुक्रबार उद्घाटन गरेका छन् ।
पुलको उद्घाटन गर्दै मन्त्री लेखकले दुई प्रदेशलाई जोड्ने कर्णाली पुलले मध्य तथा सुदुरपश्चिमको आर्थिक समृद्धिमा महत्वपुर्ण भुमिका हुने बताए । उनले भने, ‘यस पुलले दुवै प्रदेशका जनताको संस्कृतिक तथा आर्थिक समृद्धिको विकासमा सहयोग पुग्ने छ ।’
सांसद तप्तबहादुर विष्टले चिसापानीदेखि हुम्लासम्मको खण्डलाई नै कर्णाली करिडोरमा राख्नु पर्ने बताए ।
राकम कर्णाली पुल बनेपछि कोहलपुर भएर धनगढी हुँदै अछाम पुग्न र कोहलपुर भएर दैलेख राकम कर्णाली हुँदै अछाम पुग्न २ सय २० किलोमिटर दूरी कम हुने भएको पुष्पलाल (मध्यपहाडी लोकमार्ग पश्चिम खण्ड) का आयोजना प्रमुख सूर्यबहादुर भाटले बताए ।
पुष्पलाल(मध्यपहाडी लोक मार्ग) आयोजना अन्तर्गत अछामको वेलखेत र दैलेखको जाक्सी जोड्ने कर्णाली नदीको पुलले मध्यपश्चिम तथा सुदूरपश्चिमलाई छोटो दूरीमा जोडेको आयोजना प्रमुख भाटले जानकारी दिए ।
दैलेखको जाक्सी र अछामको बेलखेत जोड्ने २ सय मिटर लामो पुल भ्याट बाहेक १९ करोड ८४ लाख ६३ हजारको लागतमा सम्पन्न भएको छ । २०० मिटर मध्ये १ सय २७ मिटर पक्की र ७५ मिटर ट्रस रहेको छ ।
प्रकाशित मिति: २ पुष २०७३, शनिबार ०९:५८
