काठमाडौं, २४ मंसिर । तराई मधेसका जिल्लाबाट प्रतिनिधित्व गर्ने नेपाली कांग्रेस सांसदहरुले स्थाननिय तहको पुर्नसंरचना गर्न बनेको आयोगको काम प्रति असंतुष्टी जनाउदै स्थानीय तह पुनर्संरचनाको काम सम्वन्धित जिल्लाहरुमा नै पुगेर गर्न माग गरेका छन् । यसका साथै संक्रमणकालीन व्यवस्था अनुसार हालको गाविस र नगरपालिकालाई नै गाउँपालिका र नगरपालिका घोषणा गरी स्थानीय चुनाव गर्न माग गरेका छन् । कांग्रेसका २७ सांसदहरुले शुक्रबार संयुक्त विज्ञप्ति जारी गर्दै सांसदहरुलाई केन्द्रमा बोलाएर सुझाव लिएकोमा आपत्ति जनाएका छन् ।स्थानीय तह पुनर्संरचना आयोगले सम्बन्धित जिल्लाहरुमा सुझाव दिनु पर्ने भन्दै विज्ञप्तिमा भनिएको छ, ‘हामी काठमाडौंको होटलमा होइन जिल्ला जान तयार छौं । जिल्लामा नै गई समुदायका बिचमा एवं राजनीतिक दलहरुसँग सुझाव लिन स्थानीय तह पुनर्संरचना आयोगसँग हाम्रो आग्रह छ ।’
मधेस केन्द्रित दलहरुले अवरोध गरेको भन्दै आयोगले बुधबार र बिहीबार प्रदेश नम्बर २ का सांसदहरुलाई बोलाएर काठमाडौंमा छलफल गरेको थियो । र, चार दिनभित्र स्थानीय तहको पुनर्संरचना गरेर प्रतिवेदन बुझाउन प्राविधिक समितिलाई भनेको छ । कांग्रेसका सांसदहरुले भने जनसंख्या एवं भूगोललाई आधार मानेर गाउँपालिका र नगरपालिकाको सीमांकन गर्न माग गरेका छन् । ‘गाउँ, नगरलाई जनसंख्या छुट्याउँदा असमान वा अवैज्ञानिक जनसंख्या हामीलाई मान्य नहुने पनि प्रष्ट गर्न चाहन्छौं,’ उनीहरुले विज्ञप्तिमार्फत् भनेका छन् ।
साथै संक्रमणकालीन व्यवस्था अनुसार हालको गाविस र नगरपालिकाकै चुनाव गर्न माग गरेका छन् । ‘आयोगले सरकार समक्ष हाल भइराखेको गाउँ विकास समितिलाई नै गाउँपालिका र नगरपालिका घोषणा गरी सरकारको धारणाअनुसार चैत्र मसान्तभित्र स्थानीय निकायको निर्वाचन गरी देशलाई निकास दिन आवश्यक छ,’ विज्ञप्तिमा भनिएको छ । कांग्रेस सांसदहरुले संविधान संशोधन प्रस्ताव संसदमा दर्ता भएको भन्दै मधेस केन्द्रित दलहरुलाई पनि स्थानीय निर्वाचनमा भाग लिने वातावरण बनेको दाबी गरेका छन् ।
यसरी विज्ञप्ती जारी गर्नेहरुमा आनन्द ढुंगाना, प्रेमकिशोर प्रसाद साह, प्रमिला देवि दास, तेजुलाल चौधरी, लालबाबु सिंह, किरण यादव, अब्दुल रज्जाक, महेन्द्र यादव, मीन विश्वकर्मा, संगिता मण्डल,सिताराम भण्डारी,रश्मी ठाकुर, भोटनीदेवि खवास, शान्ति चौधरी, दिनेश प्रसौला यादव, सावित्रीदेवि चौधरी, मिनाक्षी झा, रामकृष्ण यादव, राधेचन्द्र यादव, सुरेन्द्रप्रसाद चौधरी, राजेन्द्रबहादुर अमात्य, फरमुल्ला मन्सुर, रामअयोध्याय यादव, रामचन्द्र चौधरी, डा गणेश मण्डल,हरेशकुमार महतो, अनिलकुमार रुङ्गटा रहेका छन् ।
प्रकाशित मिति: २४ मंसिर २०७३, शुक्रबार १७:२२
