सुर्खेत, १८ मसिंर । सुर्खेत उद्योग वाणिज्य संघको आयोजनामा सञ्चालन हुने कर्णाली एक्सपो अन्तर्राष्ट्रिय व्यापार मेलामा स्टल तथा अवलोकनका लागि आउनेहरुको सुरक्षाका लागि मेलास्थल वरपर सीसी क्यामेरापनि जडान गरिने भएको छ ।
मेलामा रहने स्टल तथा अवलोकनका लागि आउनेहरुको सुरक्षाका लागि निजी सुरक्षाकर्मी र प्रहरी परिचालन गर्नुका साथै मेलास्थल वरपर सीसी क्यामेरापनि जडान गरिने भएको हो । चोरी, लुटपाट र बालबच्चा हराउने समस्या समाधानका साथै स्टलहरुको सुरक्षा निगरानीका लागि कम्तिमा ४० वटा सीसी क्यामेरा जडान गर्न लागिएको महासचिव गोपालकृष्ण गिरीले बताएका छन् ।
यही मंसिर २३ देखि सञ्चालन हुने कर्णाली एक्सपो अन्तर्राष्ट्रिय व्यापार मेलामा २० वटा अन्तर्राष्टियसहित ३ सय ३० स्टल दर्ता भएका छन । मेलामा चीन, भारत, बंगालादेश, पाकिस्तान तथा थाइल्याण्डका गरी अहिलेसम्म २० वटा अन्तर्राष्ट्रिय कम्पनीका स्टल दर्ता भैसकेको स्टल व्यवस्थापन समितिका संयोजक धनबहादुर रावतले जानकारी दिए ।
अन्तर्राष्ट्रिय स्टलका लागि भारत, बंगलादेश, थाइल्याण्ड, पाकिस्तानमा रहेका इभेन्ट व्यवस्थापक कम्पनीसंग समन्वय गरी स्टल बुकिङ गरिएको उनले बताए ।
राष्ट्रिय तथा अन्तर्राष्ट्रिय गरी जम्मा ४ सय स्टल रहने मेलामा हालसम्म नेपालभित्रका ३ सय १० स्टल दर्ता भैसकेको संयोजक रावतले जानकारी दिए ।
मेलामा बिदेशी कम्पनीका ब्राण्डेड तयारी पोशाक, विद्युतीय सामग्री, छालाका सामग्रीहरु, फर्निचर तथा मार्बलहरुको स्टलको ब्यबस्था मिलाइएको उनको भनाई छ ।
प्रदर्शनीले विभिन्न देशका व्यवसायीहरुबीच व्यापार विस्तार, प्रविधि हस्तान्तरण, आयत निर्यात तथा पर्यटन प्रदद्र्धनमा टेवा पुर्याउने अपेक्षा गरिएको आयोजक संघका महासचिव गोपालकृष्ण गिरीले बताए।
जिविस अगाडिको खुल्ला मैदानमा हुने चौरमा मंसिर २३ देखि पौष ३ गतेसम्म यस क्षेत्रकै पहिलो अन्तर्राष्ट्रिय मेलाका रुपमा कर्णाली एक्स्पो सञ्चालन हुन लागेको हो ।
प्रकाशित मिति: १८ मंसिर २०७३, शनिबार १४:०३
