बिदुर, १२ मंसिर । नुवाकोट जिल्लाको क्षेत्र नम्बर २ अन्तरगत घ्याङ्फेदी र शिखरबेशी गाविस जोड्ने कुतुङ खोला र शिखरबेशीको वडा नम्बर १ र वडा नम्बर ५ जोड्ने नेगी खोलामा पक्की मोटरबाटो पुलको सिलान्यास गरिएको छ । नेपाली काँग्रेसका केन्द्रिय सदस्य एंव पूर्वअर्थमन्त्री डाक्टर रामशरण महतले शिलान्यास गर्दै जिल्लाको विकासमा सक्रिय भएर लाग्दै आएको दाबी गरेका हुन् ।
आफुलाई बिश्वास गरेर चार पटकसम्म व्यवस्थापिका संसद्को सदस्य पदमा विजयी गराउने जनतालाई शिक्षा, स्वास्थ्य लगायत विकास निर्माणको विकासको लागी सदैव लागी पर्ने डाक्टर महतले प्रतिबद्धता जनाए । पूर्व अर्थमन्त्री डाक्टर महतले भूकम्प पीडित जनताको लागी सरकारले प्रदान गरेको पहिलो किस्ता बापतको ५० हजार रुपैयाँको सहि सदुपयोग गरी भुकम्प प्रतिरोधी घर निर्माण शुरु गरे बाँकी अनुदान सहज रुपले पाउने भएकाले दुरुपपयोग नगर्न समेत आग्रह गरे ।
२ करोड २९ लाख रुपैयाँको लागतमा निर्माण हुन लागेको घ्याङ्फेदी र शिखरबेशी गाविस जोड्ने कुतुङ खोलामा पक्की मोटरबाटो पुलको निर्माण गर्ने जिम्मा त्रिशुली थानी कन्ट्रक्सनले बनाउने जिम्मेवारी पाएको छ । यस्तै, ३ करोड रुपैयाँ लगानीमा बनाउनका लागेको शिखरबेशीको वडा नम्बर १ र वडा नम्बर ५ जोड्ने नेगी खोलामा पक्की मोटरबाटो पुलको जिम्मा गुल्लीभर वल्र्ड कन्ट्रक्सन काठमाडौले पाएको छ ।
अर्को वर्षको कार्र्तिक मसान्त सम्ममा निर्माण सम्पन्न गनुपर्ने भएपनि निर्माणको ठेक्का पाएको ठेकेदार कम्पनीहरुले ६ महिना भित्र निर्माण पूरा सम्पन्न गर्ने प्रतिबद्धता जनाएका छन । दुवै पक्की पुलको शिलान्यास कार्यक्रममा नेपाली काँग्रेसका युवा नेता एंव महासमिति सदस्य रमेशकुमार महत, क्षेत्र नम्बर २ का क्षेत्रिय सभापति ध्रुव श्रेष्ठ, महासमिति सदस्य डिल्लीप्रसाद ढकाल, नेपाल बिद्यार्थी संघका केन्द्रीय सदस्य जयराम दाहाल, तरुणदलका निबर्तमान केन्द्रीय सदस्य प्रमोद रिमाल, क्षेत्र नम्बर २ का क्षेत्रिय सचिव रामजी पौडेल, तरुण दलका नुवाकोट सचिव सुमन गिरी लगायतको सहभागिता रहेको थियो ।
प्रकाशित मिति: १२ मंसिर २०७३, आईतवार १७:३१
