पाल्पा, ७ मङ्सिर । छहरा गाविस–४ मङ्गालखेतको पानी मुझुङ्ग गाविस–७ को गोजरकोट डाँडामा पानी आउन थालेसँगै स्थानीय बासिन्दा खुसी भएका छन् ।
मङ्गालखेतको पानी विद्युतीय शक्तिको सहायतामा डाँडामा पानी आउन थालेसँगै यहाँका १५४ घरधुरी खानेपानीको सुविधाबाट लाभान्वित हुनेछन् । मुझुङ्ग गाविस वडा नं १, २, ४, ७ र ८ तथा छहरा–५, मङ्गलका स्थानीयले समेत पानीको उपभोग गर्नेछन् ।
बर्सेनि पानीको समस्या भोग्दै आएका यहाँका स्थानीयका घरघरमा पानीको धारा जडान हुने भएको हो । मुझुङ्ग गाविस–१, लेखटोलका स्थानीयलाई पानीको जोहो गर्ने निकै समस्या हुँदै आएको थियो । लेखटोलबासी मुझुङ्ग–७, पिपौदीको हिउँदको महिनामा पानी मुहान सुक्दा कुवा खोज्दै हिँड्न बाध्य भएको स्थानीय बासिन्दा नरेश कार्कीले जानकारी दिए ।
मुझुङ्ग लिफ्ट खानेपानी तथा सरसफाइ आयोजनामार्फत नेपाल सरकारले रु एक करोड ७२ लाख लगानीमा सञ्चालन भएपछि एक हजार ३०० मिटर तल मङ्गालको खेतबाट पाइपलाइन विस्तार गरी विद्युत्को सहायतामा गोजरकोट डाँडामा पानी आउन थालेको हो ।
करिब तीनवर्षको अवधिमा खानेपानीको योजनाले विद्युत्को सहायताले पानी डाँडामा पुग्न थालेसँगै वर्षौंदेखिको पानीको समस्या समाधान हुने स्थानीयको दाबी छ । पानीको अभावले यहाँका महिला तथा बालबालिका बढी समस्यामा पर्दै आएका थिए ।
मङ्गालमा मूलको पानी सङ्कलन गर्न पानी ट्याङ्की, प्यानबोर्ड सुरक्षाका लागि भवन, शौचालय, पानीको मुहान आसपासको क्षेत्रमा तारजालीले सुरक्षित गरिएको मुझुङ्ग लिफ्ट खानेपानी तथा सरसफाइ उपभोक्ता समितिका सदस्य लोकबहादुर बुढाथोकीले बताए ।
मूलमा पानी तान्नका लागि विद्युत् मोटर जडान, विद्युत् ट्रान्समिटर, भालुखानदेखि मूलसम्म पाइपलाइन विस्तार र पानी सङ्कलनका लागि गोजरकोटमा ट्याङ्की निर्माण कार्य सुरु भएको छ ।
घरघरमा पानी लैजान पाइपलाइनका लागि खन्ने काम सम्पन्न भएपछि स्थानीका घरघरमा पानी पुग्ने स्थानीय बासिन्दा तथा खानेपानी उपभोक्ता समितिका सदस्य गणेश राना बताउछन् । खानेपानी आयोजना पुस महिनाको मसान्तभित्र सबै काम सम्पन्न गरी डिभिजन खानेपानी कार्यालय पाल्पाले स्थानीयलाई हस्तान्तरण गर्नेछ । रासस
