काठमाडौ ८ कात्तिक । नेपाली फुटबल नेतृत्व २ दशकपछि परिवर्तनको संघारमा छ । तत्कालिन अध्यक्ष गणेश थापा भ्रष्टाचारको अभियोगमा १० बर्षको प्रतिबन्धमा परेपछि एन्फाले नयाँ नेतृत्व छान्न लागेको हो ।
विवाद, भ्रष्टचार र अनियमितताको पर्याय बनेको एन्फाको नयाँ नेतृत्वका लागि कार्यवहाक अध्यक्ष नरेन्द्रलाल श्रेष्ठ र उपाध्यक्ष कर्माछिरिङ शेर्पा चुनावी प्रतिस्पर्धामा उत्रिएका छन ।
साथै उपाध्यक्षमा उपेन्द्रमान सिंह, दीपक खाती र मणि कुँवरले आफ्नै चुनौती पेश गर्नेछन । नेपाली फुटबलमा २ दशकबढी राज गरेका गणेश थापा औपचारिक रुपमा फुटबल गतिविधिबाट बाहिरिएपनि फुटबलको प्रशासनिक निकाय एन्फा उनको प्रभावबाट बाहिर आउन सकेको छैन । कान्तिपुर दैनिकमा खबर छ ।
मनोनित उपाध्यक्षको रुपमा एन्फा भित्राईएका नरेन्द्रलाल श्रेष्ठ मार्फत थापाले अझै पनि लोभ र धम्कीको रणनीति उपयोग गर्दै फुटबल प्रशासन चलाउदै आएको धेरैको आरोप छ । नयाँ नेतृत्वका प्रत्यासी नरेन्द्र श्रेष्ठ पनि आफुलाई थापाको समर्थन रहेको सहजै स्विकार गर्छन । उनले भने “फुटबलमा लामो समयको सहकार्यले पनि धेरै आरोह अवरोहमा हामीले संगै काम गरेका छौं ।” नेपाली फुटबलका पछिल्ला दुई बर्ष एन्फाभित्रका भ्रष्टचार विषय सतहमा आए ।
संघ भित्रका आर्थिक अनियमितताको बिषय संसदको सार्वजनिक लेखा समितिमा छानविन भयो । फुटबलको सार्वेच्च निकाय फिफाले समेत भ्रष्टचारको आरोपमा एन्फाका तत्कालिन अध्यक्ष गणेश थापामाथी १० बर्षको प्रतिबन्ध र २१ लाख स्विस फ्राङ्क जरिवाना गर्यो । एन्फाभित्रका सबै विकृतीका भण्डाफोर गर्ने अभियानका नेतृत्व गरे, एन्फाका उपाध्यक्ष कर्माछिरिङ शेर्पाले । उनै शेर्पा यति बेला नेपाली फुटबलको नेतृत्वका लागि चुनावी मैदानमा छन ।
उनका एजेन्डा स्पष्ट छन, एन्फाभित्रका आर्थिक, नीतिगत र प्रशासनिक पारदर्शिता सहितको फुटबल विकास । जिल्ला संघका ४५, ए डिभिजन क्लवको १२ बी को ५ र सी को ३ रेफ्रि खेलाडी प्रशिक्षक र महिला कमिटिको १–१ गरी ६९ मत रहेपनि कुमारी क्लव कारबाहीमा परेको र प्रतिनिधि विवादका कारण झापा जिल्लाको सहभागिता नरहने भएपछि चुनावमा ६७ जनाले मताधिकार प्रयोग गर्न पाउनेछन् ।
चुनावी प्रतिस्पर्धाबाट नयाँ नेतृत्व चयन गर्नु आफैंमा राम्रो बिधि भएपनि पात्र र प्रवृतिको निरन्तरता एन्फा चुनावको महवपूर्ण पाटो बन्ने निश्चित छ । झट्ट हेर्दा एन्फामा क्रम भंगताको शुरुआत हुने देखिए पनि सारमा नेतृत्वका आकांक्षीहरुले एन्फासहित नेपाली फुटवललाई नेतृत्व प्रदान गर्ने भन्दा अघिल्लो नेतृत्वको छाँयाबाट आफूलाई मुक्त राख्ने प्रयास मात्रै गरेको देखिन्छ । त्यसैले एन्फामा पात्र फेरिए पनि प्रवृति नफेरिने पो हो कि भन्ने फुटवलप्रेमीको संशयलाई चिर्न निर्वाचनमार्फत् चुनिने नेतृत्वले ठूलै कसरत गर्नुपर्ने देखिएको छ ।
प्रकाशित मिति: ८ कार्तिक २०७३, सोमबार ०६:३५
