दैलेख, ७ कात्तिक । नेपाली कांग्रेसका नेता एवं पूर्व महामन्त्री प्रकाशमान सिंहले संविधानको प्रभावकारी कार्यान्वयनमा पार्टी नेतृत्वले नेतृत्वदायी भूमिका निर्वाह गर्न नसकेको बताएका छन् । उनले कांग्रेस पहिलो पार्टी भएर पनि प्रभावकारी भूमिका खेल्न नसक्नु पार्टी सभापतिको कम्जोरी भएको टिप्पणी गरे ।
नेपाली कांग्रेस दैलेखले आइतबार आयोजना गरेको पार्टी कार्यकर्ता भेटघाट कार्यक्रममा बोल्दै कांग्रेस केन्द्रीय सदस्य समेत रहेका पूर्व उपप्रधानमन्त्री सिंहले पार्टीले संविधान कार्यान्वयनका लागि तीनै तहको निर्वाचनको वातावरण तयार गर्न पहलकदमी लिनु पर्ने समय आएको बताए ।
संसदमा दर्ता भएको महाअभियोग सम्बन्धी आफ्ना धारणा राख्दै कांग्रेस नेता सिंहले महाअभियोग सिफारिस समितिले दिएको प्रतिवेदन र छलफलका आधारमा कांग्रेसले उचित समयमा उचित निर्णय लिने बताए । उनले भने, सिफारिस समितिले दिने प्रतिवेदनको लेखाजोखाको आधारमा निर्णय लिन्छ्, उचित समयमा उचित निर्णय लिने कांग्रेसको पुरानै पहिचान हो ।
कांग्रेस नेता सिंहले पार्टीमा सत्ता स्वार्थ र कमाउ जस्ता गलत प्रवृत्ति हावी हुँदै गएको हुनाले त्यस्तो प्रवृत्तिलाई रोक्नु पर्ने वेला आएको बताए । उनले भने, यस्ता प्रवृत्तिका विरुद्ध हामी नबोले कस्ले बोल्ने । उनले पार्टीलाई योग्दान दिने नभई पार्टीबाट आफु बन्ने गलत प्रवृत्तिले पार्टीमा प्रसय पाएको आभास हुन थालेको बताए ।
कार्यक्रममा सहकारी एवं गरिबी निवारण मन्त्री हृदयराम थानीले निकट भविश्यमा आउन लागेको सहकारी ऐन कोषे ढुंगाको रुपमा स्थापित हुने बताए । उनले सहकारी ऐन बने सहकारीका देखिएका समस्या समाभान भएर जाने दावी गरे ।
कांग्रेस केन्द्रीय सदस्य समेत रहेका मन्त्री थानीले शान्तिपूर्ण आन्दोलनबाट प्राप्त भएको ६ नम्बर प्रदेशका लागि चुनौती र अवसर दुवै भएको बताए । प्रचुर मात्रामा रहेका साधन स्रोतलाई उपयोग गरी विकास गर्न सके पांच वर्ष भित्रमा आर्थिक समृद्धि प्राप्त गर्न सकिने उनले दावी गरे ।
नेपाली कांग्रेस दैलेखका सभापति कृष्णबहदुर विसीको सभापतित्वमा भएको कार्यक्रममा सांसद रिता शाही, पूर्व मन्त्री शिवराज जोशी, कांग्रेस सुर्खेतका सभापति कमलराज रेग्मी लगायतले स्थानीय निकायको निर्वाचनको वातावरण बनाउन नेतृत्वलाई आग्रह गरेका थिए ।
प्रकाशित मिति: ७ कार्तिक २०७३, आईतवार १८:५६
