सुर्खेत, ६ कात्तिक । नेपाली कांग्रेसका नेता पूर्व महामन्त्री प्रकाशमान सिंहले जनताको विश्वास जितेर कांग्रेस अघि बढ्नु पर्ने बताएका छन् । उनले जनताले विश्वास गरेर दिएको मत अनुसार गुट उपगुट नगरेर अघि बढ्नु पर्ने कुरामा जोड दिए ।
नेपाली कांग्रेस सुर्खेतले वीरेन्द्रनगरमा शनिबार आयोजना गरेको कार्यकर्ता भेटघाट कार्यक्रममा बोल्दै नेता सिंहले संविधान लागु गर्नको लागि कांग्रेसको ध्यान जान जरुरी रहेको बताए । उनले कांग्रेस सदैव जनताका हक र हितका लागि लड्ने भएको हुँदा जनतालाई दुःख भन्दा पनि सुख दिनका लागि सदैव लड्नु पर्ने बताए । पार्टी संघठनमा पूर्ण रुपमा संरचना नभएको हुनाले संरचना बनाउन नेपाली कांग्रेस तिव्र रुपले काम गर्नु पर्ने भएपनि त्यसो हुन नसकेको उनले दुखेसो पोखे ।
कांग्रेस केन्द्रीय सदस्य समेत रहेका नेता सिंहले संगठनलाई अझै सुधार गर्नका लागि बिधान अनुसार निष्पक्ष र स्वतन्त्र रुपले पार्टीमा सञ्चालन गर्नु पर्ने बताएका छन् । साथै उनले अहिले सीमाकंनका लागि आवाज उठिरहेका बेला सबै दलहरु मिलेर समस्याको समाधान खोज्न तर्फ लाग्नु पर्ने बताए ।
खाडीमुलुकमा पसीना बगाउन बाध्य भएका युवाहरुका लागि नेपालमा रोजगार दिलाउन सबै दलहरु मिलेर अघि जानु पर्ने कांग्रेस पूर्व महामन्त्री सिंहले जोड दिए । उनले नेपाललाई आर्थिक क्रान्तिका रुपमा अगाडि बढाउनका लागि सबै दलहरु एकजुट भएर अघि बढ्नु पर्ने अहिलेको आवश्यकता भएको उनको भनाइ छ । उनले नेपालमा अथाह जलसम्पदा, पर्यटन, जडिबुटी लगाएत कुराहरुमा नेपाललाई अझै विकास गर्नका लागि सबै दलहरु एक जुट हुनु पर्ने बताए ।
कार्यक्रममा सहकारी तथा गरिबी निवारण मन्त्री हृदयराम थानीले आफुले इमानदारीताका साथ जनताका लागि सदैब काम गर्ने प्रतिवद्धता जनाए । उनले जनताको घरदैलोमा पुगेर जनताले चाहे अनुसारको काम गर्ने संकल्प गरे ।
हुम्लाकी सांसद रिता कुमारी शाहीले राज्यले महिलालाई ३३ प्रतिशत छुट्याइए पनि अहिलेसम्म पार्टीले लागु नगरेको उनले गुनासो गरिन् । उनले महिलालाई राज्यले मात्रै ३३ प्रतिशतको व्यवस्था गरे जस्तै दलहरुले पनि ३३ प्रतिशतको व्यवस्था लागुु गर्नुपर्ने बताइन् ।
नेपाली कांग्रेस सुर्खेतका सभापति कमलराज रेग्मीको सभापतित्वमा भएको कार्यक्रममा पूर्व केन्द्रीय सदस्य शिवराज जोशी, पूर्व जिल्ला सभापति गोविन्द बहादुर मल्ल, नेपाल महिला संघ सुर्खेतकी सभापति पार्वती गिरी, नेपाली कांग्रेस सुर्खेतका कोषाध्यक्ष अन्नत प्रसाद पौडेल लगायतले आ–आफनो भनाई राखेका थिए ।
प्रकाशित मिति: ६ कार्तिक २०७३, शनिबार १७:५७
