काठमाडौँ, ४ कात्तिक । अख्तियार दूरुपयोग अनुसन्धान आयोगका प्रमुख आयुक्त लोकमान सिंह कार्की विरुद्ध संसदमा दर्ता भएको महाअभियोग सम्बन्धी प्रस्तावमाथि आज हुने भनिएको छलफल स्थगित भएको छ । संसद भवन नयाँ बानेश्वरमा दिउँसो बोलाइएको वैठक एकाएक संसद सचिवायलय सूचना जारी गर्दै आजको वैठक सात गते सम्मलाई स्थगित गरेको छ ।
महाअभियोग लगाउन माग गर्दै एमाले र माओवादी केन्द्रका १ सय ५७ जना सांसदले संसद्मा सूचना बुधबार दर्ता गराएका थिए ।
बिशेष महत्वका साथ लिइएको आज बस्ने भनिएको संसद बैठक स्थगित भएपछि कार्कीलाई लगाउन भनिएको महाअभियोग प्रस्तावमाथिको छलफल रोकिएको हो ।
विशेष कारणबस भन्दै सभामुख ओनसरी घर्तीको आदेशमा संसद सचिवालयले सूचना टाँस गरेर बैठक आइतबार बिहान ११ बजेसम्मका लागि स्थगित गरिएको जानकारी दिएको हो ।
संसदको बैठक अचानक सूचना टाँस गरेर दुई दिन पछि सरेपछि महाभियोगको प्रस्ताव अलपत्र हुने हो कि भनेर आशंका बढेको छ ।
आजको बैठकमा महाअभियोगको प्रस्तावमा छलफलको दिन र समय तोक्ने कार्यसूची रहेको थियो ।
समितिले काम थाल्दै
महाअभियोग सम्बन्धी अध्ययन गर्न बनेको समितिले आजैबाट काम थाल्दै छ । सदन र सडकमा अख्तियार प्रमुखलाई लक्षित गरि महाअभियोग लगाउनपर्ने आवाज उठेपछि सभामुख ओनसरी घर्तीले समिति गठन गरेकी हुन् । सांसद भण्डारीका अनुसार आजबाट काम सुरु गरेपनि कार्यविधि तय नभएकाले अख्तियार प्रमुखलाई महाअभियोग लगाउने या नलगाउने औपचारिक निर्णय भने तिहार पछि हुनेछ । अहिले महाअभियोग समितीको अध्यक्ष चयन नभएकाले ज्येष्ठ सदस्यको अध्यक्षतामा राज्य ब्यवस्था समिति हलमा बैठक बस्ने समितिका सदस्य भण्डारीले जानकारी दिए ।
सभामुख घर्तीको जेनेभा भ्रमण स्थगित
सभामुख ओनसरी घर्तीको जेनेभा भ्रमण स्थगित भएको छ । अन्तर व्यवस्थापिका संसद सम्बन्धी बैठकमा सहभागी हुन सभामुख घर्ती शुक्रबार जेनेभा भ्रमणमा जाने कार्यक्रम थियो ।
अख्तियार प्रमुख लोकमान सिंह कार्कीविरुद्ध परेको महाअभियोगको प्रस्ताव पछि उत्पन्न राजनीतिक परिस्थितिका कारण घर्तीले जेनेभा जाने कार्यक्रम अन्तिम समयमा स्थगित गरेको बुझिएको छ ।
प्रकाशित मिति: ४ कार्तिक २०७३, बिहीबार १४:४९
