सुर्खेत, २९ असोज । सहकारी तथा गरिबी निवारण मन्त्री हृदयराम थानीले आगामी चैतमा स्थानीय निकायको निर्वाचन गर्नुको विकल्प नभएको बताएका छन् । उनले संविधान कार्यान्वयनका लागि निर्वाचन अनिवार्य सर्त भएको बताए ।
सुर्खेतको लेखफर्सा, दशरथपुर, कल्याण र साटाखानीमा शुक्रबार आयोजित पार्टी कार्यकर्ता भेलालाई सम्बोधन गर्दै सहकारी तथा गरिबी निवारण मन्त्री थानीले भने, ‘निर्वाचन नभएर सुख्खै छैन्, कि त संविधान आउट अफ ट्रयाक जान्छ कि त निर्वाचन हुनुपर्छ ।’
सरकार स्थानीय निकायको निर्वाचन गराउन स्थानीय निकायको पुनर्संरचना गर्न लागि परेको बताउँदै मन्त्री थानीले स्थानीय निकायको पुनर्संरचना गर्दा जनभावनालाई समेत मध्यनजर गरिने बताएका छन् । उनले स्थानीय निकाय पुनर्संरचनाले जनताले सहज रुपमा राज्यको सेवा सुविधा पाउन भन्ने उद्देश्य रहेको बताए ।
कांग्रेस केन्द्रीय सदस्य समेत रहेका मन्त्री थानीले जनताको दवावमुलक आन्दोलनबाट संघीय संरचना बमोजिम स्थापित भएको ६ नम्बर प्रदेशको राजधानीको पूर्वाधार सुर्खेतमा बन्दै जानु सुर्खेती जनताका लागि मात्र नभई समग्र कर्णाली, भेरी र राप्तीका जनताका लागि खुसीको कुरो भएको बताए ।
प्रदेश राजधानीका लागि सुर्खेतको वीरेन्द्रनगरमा राज्यका निकाय उच्च अदालत, मेडिकल कलेज, औद्योगिक क्षेत्र, खेलकुदको कवर्डहल लगायतका संरचना तयार हुँदै जानु आन्दोलनको उपलब्धी भएको मन्त्री थानीले बताए ।
त्यसैगरी प्रदेश राजधानीका लागि आवश्यक पूर्वाधार विकास अन्र्तगत कोहलपुर–सुर्खेत टु लेन सडक विस्तार, वीरेन्द्रनगरको धुलियाविट–बाँङ्गेसिमल फोर लेन सडक निर्माण, सुर्खेत उपत्यकाका लागि भेरी लिप्ट खानेपानी आयोजना जस्ता महत्पूर्ण विकासका पूर्वाधार तयार हुँदै जानु सुर्खेत जनताका लागि गौरवको कुरो भएको मन्त्री थानीले बताए ।
कार्यक्रममा सुर्खेत कांग्रेसका सभापति कमलराज रेग्मीले संघीय संरचना अनुसार हुना लागेको स्थानीय निकाय, प्रदेश र संघीय निर्वाचन अभियानमा जुट्न कार्यकर्ताहरुलाई आग्रह गरे । उनले निर्वाचन अभियानसंग संगै विकास निर्माणका कुरालाई जनताको घर दैलोमा पुर्याउन समेत आग्रह गरे ।
प्रकाशित मिति: २९ आश्विन २०७३, शनिबार ०७:४६
