काठमाडौं, २८ असोज । प्रमुख विपक्षी दल नेकपा एमालेले बिभिन्न चाँडपर्वका उपलक्ष्यमा हरेक बर्ष गर्दै आएको चियापन शनिवार गर्दैछ । नेपाली कांग्रेसका संस्थापक नेता वीपी कोइरालाले २०३३ सालमा मेलमिलापको नीति लिएर स्वदेश फिर्ता भएपछि मेलमिलापका लागि थालेको चियापान संस्कृतिलाई पछिल्लो समयमा सवै राजनीतिक दल तथा संघ संस्थाहरुले पछ्याउदै आएका छन् । कांग्रेसले हरेक कोजाग्रत पुर्णिमाको दिन चियापान गर्दै आएपछि यो पटक सुशील कोइराला पार्टी सभापति भएकै समयमा निधन भएकाले चियापना नगर्ने भएको छ । एमालेले भोलि आजोजना गरेको चियापानको तयारी पूरा भएको जनाएको छ । प्रचार विभाग प्रमुख योगेश भट्टराईका अनुसार, सुरक्षा, स्वयम्सेवक परिचालन, सरसफाइ जस्ता तयारी पूरा भएका छन् ।
एमालेले चियापानका लागि ३० हजार निमन्त्रणा बाँडेको छ । अघिल्ला वर्षको तुलनामा यो संख्या बढी हो । नेपालीहरुको साँस्कृतिक चाड–वाड बडा दशैं, तिहार, नयाँ वर्ष नेपाल सम्बत् ११३७, छठ, उधौली, इदलगायतका अवसरमा नेकपा (एमाले) का तर्फबाट अध्यक्ष कमरेड केपी शर्मा ओलीले यही असोज २९ अपरान्ह १२ बजेदेखि धुम्बराहीस्थित शंखपार्कमा चियापान आयोजना गरेका छन् ।
कार्यक्रमका लागि राष्ट्रपति, उप–राष्ट्रपति, प्रधानमन्त्री, प्रधानन्यायधीश, सभामुख, मन्त्रीहरु, संवैधानिक निकायका पदाधिकारी, सांसदहरु, विभिन्न राजनीतिक पार्टीका नेता, मुख्यसचिवसहित नेपाल सरकारका उच्चपदस्थ कर्मचारी, विभिन्न आयोग, समिति, संस्थान, बैंक तथा वित्तिय क्षेत्रका प्रमुख, अध्यक्ष तथा महा–प्रबन्धक, सुरक्षा निकायका अधिकारी, पूर्वप्रशासकहरु, लोकतान्त्रिक आन्दोलनका अग्रज व्यक्तित्व, नागरिक समाजका अगुवा, सहिद परिवार, उद्योगी–व्यवसायी, कलाकार, सञ्चारकर्मी, खेलाडी, विभिन्न पेशागत संघ÷संस्थाका अगुवा तथा सबै पेसाकर्मीलगायत पार्टी कार्यकर्ताहरुलाई निमन्त्रणा कार्ड पठाइसकिएको एमालेले जनाएको छ ।
यसैगरी नेपालस्थित कुटनीतिक नियोगका प्रमुख तथा प्रतिनिधिहरुका साथै कुटनीतिक क्षेत्रका व्यक्तित्वहरुलाई पनि निमन्त्रणा पठाइसकिएको छ ।
प्रकाशित मिति: २८ आश्विन २०७३, शुक्रबार ०८:३८
