काठमाडौ १० असोज-नेपाल वायुसेवा निगमले ठूला जहाज (वाइड बडी) भित्र्याउन सोमवार अन्तरराष्ट्रिय टेण्डर आह्वान गर्ने भएको छ । निगम सञ्चालक समितिको शुक्रवार बसेको बैठकले वाइड बडी खरीद गर्न अनुमति दिएसँगै निगमले टेण्डर आह्वान गर्ने तयारी गरेको निगमका प्रवक्ता रामहरि शर्माले जानकारी दिए । उनले भने, ‘२ सय ६० देखि २ सय ८० सीट क्षमताका दुईओटा एयरबस ३३०–२०० सिरिजका जहाज खरीद गर्न सोमवार टेण्डर आह्वान गरिनेछ ।’ अन्तरराष्ट्रिय उडानलाई सुदृढ गर्ने, वाइड बडी सञ्चालनका लागि आवश्यक पाइलट तथा इञ्जिनीयरहरूको व्यवस्थापनलगायत उद्देश्यसहित निगमले तत्काल दुईओटा जहाज थप्न लागेको हो । आर्थिक अभियान दैनिकमा खबर छ ।
प्रवक्ता शर्माका अनुसार उडान सुरक्षालाई ध्यानमा राखी खरीदका लागि स्वीकृत वाइड बडी विमानमा रोल्स र्वायस ट्रेण्ट ७७२ बी इञ्जिन हुनुपर्ने छ । टेण्डर बुझाउनु पर्ने म्याद ४५ दिन हुनेछ । उक्त समयावधिमा पर्याप्त टेण्डर नपरे १५ दिन थप गरिने बताइएको छ । बैङ्कर, एयरलाइन्स, म्यानुफ्याक्चरिङ आदि कम्पनीले टेण्डर दिनसक्ने शर्माले बताए ।
अन्तरराष्ट्रिय उडानका लागि पर्याप्त जहाज नहुँदा निगमले अहिले यूरोप तथा एशियाका विभिन्न देशमा सीधा उडान गर्न सकिरहेको छैन । निगममा जहाज नहुँदा नेपाल आउने पर्यटक महँगो भाडा तिर्न बाध्य भएको भन्दै निजीक्षेत्रले निगमले जहाज ल्याउनु पर्ने माग गर्दै आएका छन् ।
सुधारका लागि निगमले ल्याएको तीनवर्षे कार्ययोजनामा पनि बाइड बडी जहाज थप्दै जाने उल्लेख छ । लामो समयदेखि जहाज किन्ने भने पनि ऋणका लागि सरकार जमानी नबसेकाले निगमले जहाज भित्र्याउन सकिरहेको थिएन । तर, गत हप्तामात्र सरकारले ऋण सम्झौताका लागि जमानी बस्ने बताएसँगै निगमलाई जहाज खरीद गर्न सहज भएको हो ।
निगमले किन्न लागेको जहाजका लागि कर्मचारी सञ्चयकोष, नागरिक लगानी कोष र विभिन्न बैङ्क अहिले ऋण दिन तयार भएका छन् । तर, कोसँग ऋण लिने भन्ने टुङ्गो भने अझै नलगाइसकेको प्रवक्ता शर्माले बताए । दुईओटा जहाज खरीद गर्न निगमलाई २५ अर्ब रुपैयाँ ऋण आवश्यक पर्छ ।
निगमले हाल २ ओटा न्यारो बडी र एउटा बोइङ ७५७ मार्फत ८ ओटा अन्तरराष्ट्रिय गन्तव्यमा उडान गर्दै आइरहेको छ । यी जहाजबाट १० प्रतिशत बजार अंश ओगट्दै आएको निगमले बाइड बडी ल्याएपछि बजार अंश १६ प्रतिशत पुर्याउने लक्ष्य राखेको छ ।
ऋणको विषय केही दिनभित्रै टुङ्गो लगाउने प्रयासमा निगम रहेको प्रवक्ता शर्माले जानकारी दिए । उनले भने, ‘पहिलो जहाज १ वर्षभित्र र दोस्रो जहाज अर्को वर्ष थप्ने निगमको योजना छ ।’
प्रकाशित मिति: १० आश्विन २०७३, सोमबार ०७:४२
