जुम्ला, ९ असोज । जुम्लाकी क्यान्सर पीडित सन्ध्या शाहीको जीवन बचाउन माग गरिएको छ । जुम्लाका पत्रकारहरुले जिल्ला प्रशासन कार्यालय मार्फत ध्याकनार्षण पत्र वुझाउदै तत्काल सन्ध्याको उपचार गर्ने वातावरण सृजना गर्न नेपाल सरकारलाई माग गरेका हुन् ।
सन्धालाई भक्तपुर क्यान्सर अस्पतालले निको नहुने भन्दै मृत्यु पुर्जा थमाईसकेको छ । कर्णालीमा जन्मेकै कारण उपचारको अभाव झेल्नु परेको यथार्थलाई स्मरण गर्दै आगामी दिनमा सन्ध्याको मुहारमा हासो ल्याउन समेत माग गरिएको छ ।
ध्यानकर्षण पत्रमा दुर्गम क्षेत्रमा स्वास्थ्य सेवाको पहुँच पुग्न नसक्दा क्यान्सर उपचार नभइ कलिलै उमेरमा ज्यान गुमाउनु पर्ने अवस्था प्रति दुख व्यक्त गरिएको छ । पटक÷पटक कर्णालीमा स्वास्थ्य सेवाको सुलभताको लागि सरकारले निर्णय गर्दै आएको भएपनि कर्णालीवासीले अकालमै मृत्यु कुर्नु पर्ने अवस्था नछुटेको ध्यानाकर्षण पत्रमा उल्लेख छ ।
ध्यानाकर्षण पत्रमा भनिएको छ, कर्णालीमा सन्ध्या जस्ता कैयन विरामी दैनिक दिन मरिरहेका छन् । यसको तथ्याङ्क संकलन गरेर औषधी उपचारको प्रवन्ध गरिनु पर्छ । सन्ध्याको उपचारको लागि लामो समय देखि कर्णालीवाट पत्रकारिता गर्दै आएका उनका वुवा नवराज शाहीले घरखेत वेचिसकेका छन् ।
प्रमुख जिल्ला अधिकारी रुद्र प्रसाद पण्डितले अहिले नै प्रधानमन्त्री तथा मन्त्रीपरिषद्को कार्यालयमा ध्यानकर्षण पत्र पठाइसक्ने वताएका छन् । सन्ध्याको उपचार गरेर परिवारवाट लुटिन लागेको खुसी फिर्ता गर्न र कर्णालीमा स्वास्थ्य सेवालाई प्रभावकारी बनाउन पत्रकारहरुले माग गरेका छन् । शनिबार मात्रै क्यान्सर पिडित सन्ध्या शाहीले स्वास्थ्यमन्त्री गगन थापालाई स्वास्थ्य क्षेत्रमा मौलाईरहेको वेथितिको वारेमा जानकारी दिन अन्तिम भेट्ने इच्छा रहेको भन्दै पत्र लेखेकी थिइन ।
सन्ध्या अहिले काठमाण्डौ चाहविल सरस्वती नगरमा वस्दै आएकी छिन् । उनले नेपाल तथा भारतका क्यान्सर अस्पतालमा उपचार गराइ सकेकी छिन् ।
प्रकाशित मिति: ९ आश्विन २०७३, आईतवार १७:३४
