काठमाडौँ, ७ असोज । नेपाली काँग्रेसका सभापति शेरबहादुर देउवाले स्थानीय निकायको निर्वाचन अपरिहार्य रहेको बताएका छन् ।
तरुण प्रकाशन प्रालिले प्रकाशित नेपाली काँग्रेस महाधिवेशन विशेष २००३–२००७ नामक पुस्तक लोकार्पण कार्यक्रमका अवसरमा बोल्दै नेपाली काँग्रेसका सभापति शेरबहादुर देउवा लगायत नेताहरु । तस्बिरः रोशन सापकोटा, रासस
तरुण प्रकाशन प्रालिले प्रकाशन गरेको नेपाली काँग्रेस महाधिवेशन विशेष पुस्तकको राजधानीमा आज लोकापर्ण गर्दै सभापति देउवाले स्थानीय निकाय पुनःसंरचना आयोगले तयार पारेको प्रतिवेदनलाई सबै दलले आत्मासात् गरी अगाडि बढ्नुपर्ने धारणा राखे ।
संविधानमा स्थानीय निकायको संरचना गाउँपालिका, नगरपालिका, विशेष स्वायत्त र संरक्षित क्षेत्र, सीमा र सङ्ख्या निर्धारण गरेर मात्र स्थानीय निकायको निर्वाचन गर्नुपर्ने प्रावधान छ ।
स्थानीय निकायको निर्वाचन नभएको झन्डै २० वर्ष पुगेको छ । स्थानीय निकायको निर्वाचन नहुँदा सर्वसाधारणको विकास निर्माणमा प्रत्यक्ष सहभागिता हुन सकेको छैन ।
कार्यक्रममा सभापति देउवाले संविधान कार्यान्वयन महत्वपूर्ण विषय भएको औँल्याउँदै सबै दलको साझा समझदारी बन्नुपर्ने बताए । तरुण साप्ताहिक पत्रिकाका प्रधान सम्पादक परशुराम घिमिरेले सम्पादन गरेको सो कृतिले २००३ देखि २००७ सम्म सम्पन्न नेपाली काँग्रेसको महाधिवेशनका गतिविधि तथा महत्वपूर्ण ऐतिहासिक घटनाको सङ्कलन गरेको छ ।
कार्यक्रममा सो पत्रिकामा लामो समयसम्म कार्यरत पत्रकार विन्दुकान्त घिमिरेलाई नगद रु २१ हजार र कदरपत्र प्रदान गरी सभापति देउवाले सम्मान गरेका थिए । रासस
