काठमाडौँ, ७ असोज । सहरी विकास मन्त्री अर्जुननरसिंह केसीले राम्रो काम गर्दा मन्त्रीसँगै हुने भावना लिएर अघि बढ्न र संस्थागत रुपमा चल्ने प्रवृत्ति बसाल्न निर्देशन दिएका छन् । आफ्नो कसैप्रति आग्रह–पूर्वाग्रह नरहने तर गलत काम गर्ने प्रवृत्ति आफ्ना लागि सह्य नहुने उनको भनाई थियो ।
अधिकार सम्पन्न वाग्मती सभ्यता एकिकृत विकास समितिको निरीक्षणका क्रममा कर्मचारीहरुलाई निर्देशन दिँदै मन्त्री केसीले लोकतन्त्रको आधार स्तम्भका रुपमा पारदर्शीतालाई लिइने भएकाले संस्थागत क्रियाकलापहरु पारदर्शी बनाउनु पर्नेमा जोड दिए ।
मन्त्री केसीले राष्ट्रिय पहिचानको मुख्य आधार नदी सभ्यता भएकाले वाग्मती सभ्यताको संरक्षण र सम्वद्र्धन र एकिकृत विकासका लागि लक्षित कार्यक्रमहरु दु्रतमार्गबाट अघि बढाउनुपर्ने बताए ।
स्थानीय समुदायसँगको समन्वयमा वाग्मती सभ्यता संरक्षणका लागि सार्थक प्रयत्न गरिने बताउँदै मन्त्री केसीले यसमा देखिएका राजनीतिक लगायतका समस्याहरु समाधान गर्न कुनै कसर वाँकी नराख्ने प्रतिवद्धता समेत व्यक्त गरे ।
मन्त्री केसीले वाग्मती सभ्यता संरक्षणका लागि स्थानीय तहमा देखिएका अतिक्रमण, ढल निकास लगायतका समस्या समाधान गर्ने आवश्यक प्रकृया अघि बढाइने बताउँदै सम्वद्ध निकायहरुको एकिकृत समन्वयमा जनताले प्रत्यक्ष अनुभूत गर्ने गरी परिणाम मुखी काम गर्न समेत कर्मचारीहरुलाई निर्देशन दिए ।
सरकारले आर्थिक वर्ष २०६५/६६ को बजेट वक्तव्य मार्फत नै काठमाडौँ उपत्यकाका मालपोत कार्यालयहरुमा हुने रजिष्ट्रेसन वापत उठ्ने रकमको दशमलव ०५ प्रतिशत रकम वाग्मती सभ्यताको एकिकृत विकासका लागि उपलब्ध गराउने निर्णय गरेपनि हालसम्म प्राप्त हुन नसकेकोमा आफ्नो गम्भीर ध्यानाकर्षण भएको बताउँदै निर्णय कार्यान्वयनका लागि बिशेष पहल गर्ने मन्त्री केसीले बताए ।
सहरी विकास मन्त्रालयका सचिव दिपेन्द्रनाथ शर्मा, अधिकार सम्पन्न वाग्मती सभ्यता एकिकृत विकास समितिका अध्यक्ष किशोरकुमार शाक्य, समितिका सदस्य सचिव राजेशप्रसाद सिंह लगायतले समितिले सञ्चालन गरेका कार्यहरु, आगामी कार्ययोजना तथा समस्या र चुनौतिहरुका वारेमा जानकारी गराएका थिए ।
प्रकाशित मिति: ७ आश्विन २०७३, शुक्रबार १७:३१
