काठमाडौँ, १७ साउन । प्राकृतिक सुन्दरता र विविध छटाले भरिपूर्ण सुदूरपश्चिमको प्रसिद्ध खप्तड क्षेत्रको पर्यटन विकास प्रभावकारी हुन नसेको सरोकारवालाले औँल्याएका छन् ।
संस्कृति, पर्यटन तथा नागरिक उड्डयन मन्त्रालयले अाइतबार आयोजना गरेको ‘खप्तड क्षेत्रको पर्यटकीय सम्भावना र चुनौती’ सम्बन्धी छलफलमा सहभागी वक्ताले पर्यटकीय दृष्टिकोणले अत्यन्तै महत्वपूर्ण खप्तड क्षेत्रको वृहत्तर विकासका लागि गुरुयोजना बनाई अघि बढ्नुपर्ने बताए ।
अधिकांशले खप्तड पर्यटन विकासका लागि करोडौँ बजेट गएको तर प्रतिफल शून्यसरह रहेकामा चिन्ता समेत व्यक्त गरे । साथै उनीहरुले खप्तड पर्यटन विकास समितिलाई विवादरहित बनाई, समितिको कार्यकारी निर्देशक राजनीतिक नभई विज्ञलाई नियुक्ति गरिनुपर्ने, त्यहाँ हुने आर्थिक अनियमितता रोक्नुपर्ने, समितिभित्रको राजनीतिकीकरण अन्त्य गरिनुपर्ने धारणा राखेका थिए ।
कार्यक्रममा उपप्रधान तथा रक्षामन्त्री भीमबहादुर रावलले प्राकृतिक सुन्दरता, धार्मिक तथा सांस्कृतिक सङ्गमस्थल खप्तडका विकासका लागि प्रभावकारी कार्यक्रम ल्याइनुपर्ने खाँचो औँल्याए । प्राकृतिक सुन्दरताको अनन्त संरक्षणमा जोड दिँदै उहाँले खप्तडलाई राजनीतिक अस्थिरताको चक्रबाट अलग गराइनुपर्ने बताए ।
संस्कृति पर्यटन तथा नागरिक उड्डयनमन्त्री आनन्दप्रसाद पोखरेलले नेपालको आर्थिक समृद्धिको दरिलो आधार पर्यटन क्षेत्र भए पनि यो अझै पनि सरकारको प्राथमिकतामा नपरेको उल्लेख गरे । “अहिले पनि पर्यटनलाई प्राथमिकता छैन, पर्यटकीय पूर्वाधार विकासमा खर्च गर्नै सकेको छैन त्यसैले सरकारले चालु आवमा सात प्रदेशमा नयाँ गन्तव्य प्रवद्र्धन गरी घरबास कार्यक्रमलाई विस्तार गर्ने योजनाबद्ध काम अघि बढाएको छ”–उनले भने ।
कार्यक्रममा पूर्व मुख्यसचिव लीलामणि पौड्यालले खप्तडको पछिल्लो स्थलगत अवलोकनको जानकारी गराउँदै खप्तड पर्यटन विकासका लागि ठूलो बजेट जाने गरेपनि काम प्रभावकारी नदेखिएको बताए ।
पर्यटन मन्त्रालयका सहसचिव डण्डुराज घिमिरेले खप्तड क्षेत्र पर्यटन विकासमा हालसम्म भएको संक्षिप्त प्रगति प्रस्तुत गरेका थिए ।
सांसद कर्ण थापा, प्रेम आलेले खप्तड क्षेत्र पर्यटन विकासका लागि सरोकारवाला सक्रिय हुनुपर्नेमा जोड दिए । रासस
