हुम्ला, ९ साउन । नेपागन्ज सुर्खेत हुँदै सिमकोटको मार्ग प्रयोग गरी मानसरोवर कैलाश यात्रा गर्ने भारतीय तीर्थ यात्रीका कारण हुम्लाको पर्यटन व्यवसाय फस्टाएको छ । भारतीय पर्यटकले यो मार्ग प्रयोग गर्दा ट्राभल एजेन्सी र हवाई कम्पनी देखि होटल व्यवसायलाई ओसार पसार गर्न र वास व्यवस्था मिलाउन भ्याइ नभ्याइ भएकाले पर्यटन व्यवसाय फस्टाउन थालेको हो ।
सिमकोट विमान स्थलमा एकै पटक पॉच वटा जहाजले पार्क गरेको अवस्था ।
तस्बिर: जयबहादुर रोकाया
गत वर्ष बैशाखमा आएको भूकम्पका कारण चिनले तातोपानी नाका बन्द गरेपछि मानसरोवर आवत जावत गर्ने तीर्थ यात्रीले यो वर्ष हुम्लाको मार्ग प्रयोग गर्न थालेका हुन् । हुम्लाको मार्ग प्रयोग गर्दा खर्चिलो हुने भए पनि छोटा र सहज भएकाले पनि भारतीयले यो मार्ग रोज्ने गरेका छन् ।
विमानस्थल श्रोतका अनुसार आर्थिक वर्ष २०७२/७३ मा छ हजार एक सय ६७ भारतीय पर्यटकको आवागमन भएको छ भने हुम्ला भएर मानसरोवर जाने अन्य देशका दुइ सय ७६ पर्यटक रहेका छन् ।
हुम्ला आउने पर्यटकबाट सेवा शुल्क वापत प्रति पर्यटक नौ सय रुपैयाँ लिने भएकाले पनि जिविसले झण्डै ५८ लाख रुपैयाँ आम्दानी गरेको छ । जिविसको आम्दानी बढेपनि निर्वाचित जनप्रतिनिधि नभएकाले रकम सदुपयोग हुनेमा स्थानीयले आशंका गरेका छन् ।
पर्यटकबाट ठूलो रकम उठेपनि पर्यटकका लागि विमान स्थलमै सौचालय समेत नभएको र विश्राम गर्नका लागि फर्निचर लगायतका सुविधाको व्यवस्था नभएको भन्दै एक पर्यटक व्यवसायीले गुनासो गरे ।
भारतीय पर्यटकको आगमन हुन थालेपछि हुम्लामा होटल व्यवसायीले पनि काम पाएका छन् । भारतीय पर्यटकबाट ठूला मात्र होइन, साना होटल व्यवसायी पनि लाभान्वित भएका छन् ।
यो वर्ष मात्रै होटेल कैलाशका सञ्चालन गरेका रिन्जीन लामाले पहिलो वर्ष मात्रै १० लाख भन्दा बढीको कारोवार भएको वताए । स्थानीय होटलवालाले होटलको स्तर हेरि एक रातको वास र एक छाक खाना दिए वापत एक पर्यटकबाट १५ सय देखि २५ सयसम्म लिने गरेका छन् । विगत केही वर्ष यता हुम्लाको सदरमुकाम सिमकोटमा ठुला र सुविधा सम्पन्न भएका होटल व्यवसयामा पनि वद्धि हुँदै गएको छ ।
पर्यटकको आगमनमा वृद्धि भएसँगै होटल व्यवसायी मात्र नभएर मजदुर देखि हवाइ क्म्पनी र टभल एजेन्सी समेत लाभान्वित भएका छन् । नेपालगन्ज वा सुर्खेतबाट सिमकोटसम्म जहाजबाट र सिमकोट देखि तिब्ब्तको सिमा हिल्सासम्म हेलिकप्टरबाट आवत जवात गर्ने भएकाले पर्यटक ओसार पसार गर्न हवाइ कम्पनीलाइ भ्याइनभ्याइ हुने गरेको छ । दिनको १२ वजेपछि यात्रु उडान नगर्ने हवाइ कम्पनीले भारतीय पर्यटकका लागि साणो ६ बजेसम्म पनि उडान गर्ने गरेका छन् ।
भारतीय तीर्थ यात्री औसी र पूर्णीको समयमा मानसरोवर कैलाश दर्शन गर्न धार्मिक विश्वास गर्ने भएकाले यो समयमा बढी भीडभाड हुने गरेको नागरिक उड्डयन कार्यालय सिमकोटका प्रमुख भिमदत्त पन्तले बताए । पन्तका अनुसार भीडभाड हुँदा तिन वटा विमान पार्क गर्न सक्ने क्षमताको विमान स्थलमा एकै पटक पॉच वटा जहाज पार्क गराउनु परेको र चार वटा हेलिकप्टर पार्क गर्ने क्षमता भएको हेलिप्याडमा सात वटा सम्म पार्क गराउनु पर्ने बाध्यता छ ।
बढी भीडभाड हुँदा एक दिनमा जहाज र हेलिकप्टरका गरी ८३ उडानसम्म हुने गरेको कार्यालय प्रमुख पन्तको दावी छ । बिहान साढे छ वजे देखि उडान सुरु भएर कुनै दिनमा बेलुका छ बजेसम्म पनि उडान हुने गरेको कार्यालय प्रमुख पन्तले बताए । उनले भने, सामान्यतया साढे १२ वजे पछि उडान गर्न नमिल्ने भए पनि मौसम राम्रो छ भने बेलुका ६ बजे सम्म पनि उडान गर्ने गरेका छौ ।’
त्यस्तै भारतीय तीर्थ यात्रीको आगमनले मजदुर पनि लाभान्वित भएका छन् । हजारौ तीर्थ यात्रीको झोला लगायत सामान ओसार पसार गर्नु पर्ने भएकाले मजदुर पुिन लाभान्वित भएका हुन् । विमान स्थल देखि होटलसम्म र होटल देखि विमान स्थलसम्म सामान ओसार गर्दा राम्रै आम्दानी हुने भएकाले कुनै दिनमा १० हजार रुपैयाँ सम्म कमाउने गरेको मजदुरको अनुभाव छ ।
हुम्लामा लागु भएको जिएचटी कार्यक्रमका अनुसार सन् २ हजार ६ देखि यो मार्ग भारतीयले प्रयोग गर्दै आएका छन् । सन २००६ मा ५४ भारतीयले यात्रा सुरु गरेका थिए भने सन १२ मा यो सख्या बढेर आठ सय २७ पुगेको छ । त्यस पछिका वर्षमा पनि बढने क्रम घटेको छैन । भारतीय तीर्थ यात्रीको यात्रा गर्नेक्रम यो वर्ष हाल सम्म पनि जारीनै छ ।
प्रकाशित मिति: ९ श्रावण २०७३, आईतवार ११:२६
