• surkhet online bazar
  • karnali states student admission campaign
  • schedule बुधबार, बैशाख ११, २०७६

    ढुक्क भएर लगानी गर्नुस् : अर्थमन्त्री

    २६ चैत्र २०७५, मंगलवार २१:२४

    काठमाडौँ । अर्थमन्त्री डा युवराज खतिवडाले मुलुकमा राजनीतिक स्थिरता कायम भएकाले वैदेशिक लगानीकर्तालाई ढुक्क भएर लगानी गर्न आग्रह गरेका छन् ।

    नेपाल उद्योग वाणिज्य महासङ्घले आज यहाँ आयोजना गरेको नेपाल र फ्रान्सका उद्यमीबीच छलफल कार्यक्रममा उनले देश औद्योगिकरणतर्फ उन्मुख गराउन सरकारले लगानीमैत्री नीति अवलम्बन गरेका कारण वैदेशिक लगानीकर्ताको लगानीलाई आवश्यक सुरक्षा दिने र उत्पादन अभिवृद्धि गर्ने बताए । उनले भने, “फ्रान्सका लगानीकर्ताले खोजेअनुसारको लगानीको वातावरण दिन सरकार तयार छ ।” दुवै देशको हितमा हुने गरी व्यापारिक सञ्जाल विस्तार गर्नुपर्नेमा जोड दिँदै उनले फ्रान्सेली विमान सेवाले नेपालमा सिधैँ उडान भरेमा पर्यटन प्रवद्र्धनमा सहयोग पुग्ने विश्वास व्यक्त गरे । नेपाल र फ्रान्सबीचको दौत्य सम्बन्ध जतिकै मजबुत आर्थिक सम्बन्ध पनि हुनुपर्ने उनको भनाइ थियो ।

    फाइल फाेटाे

    कार्यक्रममा लगानी बोर्ड नेपालका प्रमुख कार्यकारी अधिकृत महाप्रसाद अधिकारीले भर्खरै सम्पन्न लगानी सम्मेलनको निष्कर्षसहित नेपालमा लगानीका सम्भाव्य परियोजनाका बारेमा प्रस्तुति गरेका थिए ।

    महासङ्घकी अध्यक्ष भवानी राणाले लगानीका लागि नीतिगत तथा कानूनी सुधार भएको प्रष्ट पार्दै सरकार र निजी क्षेत्रको समन्वयमा बाह्य लगानीका लागि प्रयत्न भइरहेको बताइन् । नेपालका लागि फ्रान्सका राजदूत फ्राँन्स्वइस जाभियर लेजेले दुई देशबीचको व्यावसायिक सहकार्यमा सो कार्यक्रमलाई परिणामदायी बनाउन आफ्नो तर्फबाट सक्दो सहयोग गर्ने प्रतिबद्धता जनाइन् ।

    कार्यक्रममा दिल्लीस्थित फ्रान्सेली राजदूतावासका क्षेत्रीय आर्थिक विभाग प्रमुख एवं मिनिष्टर अफ काउन्सिलर जो मार्क फनेले नेपालमा लगानी विस्तार गर्न फ्रान्सेली लगानीकर्ता इच्छुक रहेकाले त्यसको सम्भाव्यता खोजी गर्नुपर्ने बताए ।

    फ्रान्समा लगानी गरिरहेका १५ प्रतिष्ठित फ्रान्सेली कम्पनीका प्रतिनिधिको सहभागिता छ । नेपाल भ्रमणमा आएको फ्रान्सेली कम्पनीका लगानीकर्ता, उद्यमी व्यवसायीसँग भएको व्यावसायिक भेटवार्तामा नेपाली उद्यमी व्यवसायीले सहकार्यका सम्भाव्य क्षेत्र प्रस्तुत गरेका थिए । सो अवसरमा फ्रान्सेली कम्पनीका तर्फबाट जल तथा नवीकरणीय ऊर्जा, सूचना तथा सञ्चार प्रविधि, दिगो र स्मार्ट शहरीकरण, कृषि तथा खाद्य प्रशोधन, शहरी यातायात, फोहर व्यवस्थापनलगायत क्षेत्रमा सहकार्यको सम्भाव्यता प्रस्तुत गरिएको थियो ।

    प्रतिकृया लेख्नुहोस्:

    सूचना विभाग दर्ता न: २२०/०७३-७४
    सम्पादक तथा सञ्चालक :
    मोतीलाल पौडेल
    मोबाइल : ९८५८०५००१०/९८५१२६००१०

    YouTube Videos from Kahbarera HD

    Subscribe