सोमवार, मंसिर २०, २०७८

राष्ट्रपति रनिङ सिल्डको पहिलो दिन चार कीर्तिमान कायम

१९ जेष्ठ २०७३, बुधबार २०:०९

काठमाडौं, जेठ १९ गते ।
युवा तथा खेलकुद मन्त्रालयको तत्वावधानमा राष्ट्रिय खेलकुद परिषद् (राखेप) द्वारा आयोजित आठौं राष्ट्रिय राष्ट्रपति रनिङ सिल्ड विद्यालय खेलकुदको पहिलो दिन एथलेटिक्सतर्फ चार नयाँ विद्यालयस्तरको राष्ट्रिय कीर्तिमान बनेको छ ।
3
त्रिपुरेश्वस्थित दशरथ रंगशालामा भएको १ हजार ५ सय मिटर दौडको छात्रमा मध्यमाञ्चलका अजितकुमार यादव र छात्रामा मध्यपश्चिमाञ्चलकी मञ्जु रावत तथा छात्र सटपुटमा मध्यपश्चिमाञ्चलका तिलक विक र छात्रा त्रिपलजम्पमा पश्चिमाञ्चलकी विपना परियारले विद्यालयस्तरको नयाँ राष्ट्रिय कीर्तिमान कायम गरे ।
निर्धारित दूरी ४ मिनेट १४.५ सेकेन्डमा पूरा गर्दै अजितले २०६० सालमा मध्यमाञ्चलका राधेश्याम कावाले बनाएको ४ मिनेट १७.३० सेकेन्डको कीर्तिमान भंग गरे । पश्चिमाञ्चलका रोहित अधिकारी दोश्रो र पूर्वाञ्चलका प्रकाश दनुवार तेश्रो भए ।
मञ्जुले दूरी पूरा गर्न ५ मिनेट १०.४ सेकेन्ड समय लगाइन् । मञ्जुले २०७१ सालमा मध्यमाञ्चलकी संगीता खड्काले स्थापित गरेको ५ मिनेट १२ सेकेन्डको कीर्तिमानलाई विस्थापित गरेकी हुन् । पूर्वाञ्चलकी दीपा बस्नेत दोश्रो र मध्यपश्चिमाञ्चलकी निर्मला केसी तेश्रो बने ।
सटपुटमा कीर्तिमान बनाएका तिलकले १४.५४ मिटर टाढा फाले । मध्यमाञ्चलकै प्रशान्त महतोको नाममा १४.१२ मिटरको कीर्तिमान थियो । प्रशान्तले उक्त कीर्तिमान २०५६ सालमा कायम गरेका थिए । पश्चिमाञ्चलका बसन्त गुरुङ दोश्रो र मध्यमाञ्चलका वीरेन्द्र चौधरी तेश्रो स्थानमा रहे ।
विपनाले १०.५२ मिटर जम्प गर्दै मध्यपश्चिमाञ्चलकी केशरी चौधरीले २०६३ सालमा बनाएको १०.२२ मिटरको कीर्तिमान तोडिन् । केशरी यो स्पर्धाकी राष्ट्रिय कीर्तिमानधारी हुन् । १२.२० मिटरको राष्ट्रिय कीर्तिमान केशरीको नाममा यथावत् छ । मध्यमाञ्चलकी जस्ता महतो दोश्रो र पूर्वाञ्चलकी रिना रावल तेश्रो भए ।
छात्रा सटपुटमा पश्चिमाञ्चलकी बसन्ती बुढा पहिलो भइन् । बसन्तीले १०.०३ मिटर टाढा फ्याकिन् । मध्यपश्चिमाञ्चलकी सीता बुढा दोश्रो भइन् भने पूर्वाञ्चलकी विनिता राई तेश्रो बनिन् ।
छात्र त्रिपलजम्पमा पहिलो भएका मध्यमाञ्चलका भुवन महतोले १३.५९ मिटर फ्याके । मध्यपश्चिमाञ्चलका सियाराम थारु दोश्रो र महेन्द्र विक तेश्रो भए ।
प्रतियोगिताको राष्ट्रपति विद्यादेवी भण्डारीले पानसमा दीप प्रज्ज्वलन गरी त्रिपुरेश्वरस्थित दशरथ रंगशालामा आयोजित एक विशेष कार्यक्रमबीच उद्घाटन गरिन् ।
सो अवसरमा राष्ट्रपति भण्डारीले विद्यालय तहको खेलकुदले विद्यार्थीलाई आफ्नो रुचीको विभिन्न खेलमा सहभागी जनाउन वातावरण तयार गरी प्रतिभा प्रस्फुटन गर्ने अवसर प्रदान गर्ने बताइन् । राष्ट्रपति भण्डारीले सरकार, खेलाडी, प्रशिक्षक र खेलकुदसंग सम्बन्धित विभिन्न संस्था एक आपसमा हातेमालो गर्दै अगाडि बढे नेपाली खेलाडीको मनोबल उच्च भइ अन्तर्राष्ट्रिय जगतमा अझ बढी सफलता प्राप्त गर्न सकिने धारणा व्यक्त गरिन् ।
सूचना तथा सञ्चार मन्त्री शेरधन राईले समग्र समाज र देशलाई स्वस्थ्य, सभ्य, सुसंकृत, अनुशासित र विकसित बनाउन खेलकुदको अहम भूमिका रहने विचार व्यक्त गरे ।
राखेप सदस्य–सचिव केशवकुमार विष्टले दुई ठूला प्रतियोगिता सातौं राष्ट्रिय खेलकुद र १३ औं दक्षिण एसियाली खेलकुद आयोजना गर्ने सन्दर्भमा परिषद्ले आफ्नो सम्पूर्ण जिम्मेवारी समयमै पूरा गर्ने विश्वास दिलाए ।
तीनदिने प्रतियोगितामा विभिन्न ८ खेलमा पाँच विकास क्षेत्रबाट ७ सय २७ खेलाडीले ५३ स्पर्धामा प्रतिस्पर्धा गरिरहेका छन् ।
कराते :
छात्रा एकल कातामा पश्चिमाञ्चलकी विमला नेपाली पहिलो भइन् । उनले फाइनलमा मध्यपश्चिमाञ्चलकी दिब्या चन्दलाई पछि पारिन् । सो स्पर्धाको पुरुषमा पश्चिमाञ्चलका सुजन नेपालीले पूर्वाञ्चलका रोशन गुरुङलाई हराउदै शीर्ष स्थान हात पारे ।
त्रिपुरेश्वरस्थित राखेपको सेमी कभर्डहलमा भएको पुरुष ४२ केजीमा मध्यमाञ्चलका साजन लामा पहिलो भए । फाइनलमा उनले सुदूरपश्चिमाञ्चलका अभिषेक जोशीलाई हराए ।
भलिबल :
मध्यमाञ्चल क्षेत्रले आठौं राष्ट्रिय राष्ट्रपती रनिङ्ग शिल्ड प्रतियोगितामा भलिबलको छात्रतर्फ दोहोरो जित हात पार्दै अन्तिम चारमा स्थान सुरक्षित गरेको छ ।
त्रिपुरेश्वरस्थित कभर्डहलमा भएको प्रतियोगितामा मध्यमाञ्चलले पहिलो खेलमा पूर्वाञ्चललाई २१–२५, २५– १९, २५– १२ र २५– २३ ले तथा दोश्रो खेलमा मध्यपश्चिमलाई २५–२१, २५–२० र २५–२० ले पराजित गर्दै ग्रुप ख बाट पहिलो हुंदै सेमिफाइनलमा प्रवेश गरेको छ ।
लिग कम नकआउटको आधारमा भएको प्रतियोगिताको अर्को खेलमा पश्चिमाञ्चलले सुदूरपश्चिमाञ्चललाई २५–८, २५–१६ र २५–१२ ले पराजित गर्दै गु्रप क बाट सेमिफाइनलमा स्थान बनाउन सफल भयो । पराजयकका बावजुद पनि सुदूरपश्चिम सेमिमा स्थान बनाउन सफल भयो ।
छात्रा तर्फको खेलमा मध्यमाञ्चल ग्रुप क बाट पहिलो हुंदै अन्तिम चारमा स्थान बनाउन सफल भयो । मध्यमाञ्चलले सुदूरपश्चिमलाई २५–८, २५–१६ र २५–१२ ले पराजित गरेको थियो । उक्त ग्रुपमा दुई टिम मात्र भएकोले सुदूरपश्चिम पनि सेमिमा पुग्यो । अर्को खेलमा पश्चिमाञ्चलले पूर्वाञ्चललाई २५–१४, २५–२० र २५–१४ ले पराजित ग¥यो ।
कबड्डी:
मध्यमाञ्चल क्षेत्र छात्र तर्फ पूर्वाञ्चल क्षेत्रलाई पराजित गर्दै आठौं राष्ट्रपती रनिङ्ग शिलड प्रतियोगिताको दोश्रो चरणमा प्रवेश गरको छ ।
लिग कम नकआउटको आधारमा खेलाईएको प्रतियोगिताको छात्रा तर्फ सुदूरपश्चिमाञ्च क्षेत्रले मध्यपश्चिमाञ्चल क्षेत्रलाई पराजित गर्दै अर्को चरणमा प्रवेश गरेको निर्णायक तारा सिंह भाटले जानकारी गराए ।
उसु :
उसुको छात्र छाङ छ्वान्मा मध्यमाञ्चलका आशिष राई पहिलो भए । उनले ७.८५ अंक जोडे । ७.८१ अंकसाथ मध्यमाञ्चलकै दिलिप घले दोश्रो तथा ७.६० अंकसाथ सुदूरपश्चिमाञ्चलका रविन चौधरी तेश्रो बने ।
सो स्पर्धाको छात्रामा मध्यमाञ्चलकी सपना मोक्तान (७.८० अंक) पहिलो, मध्मायञ्चलकै अनु राई (७.७० अंक) दोश्रो र सुदूरपश्चिमाञ्चलकी एलिसा खाती (७.२३ अंकं तेश्रो भए ।
पुरुष नान् छ्वान्मा मध्यमाञ्चलका अजय तामाङ ७.९५ अंकसाथ पहिलो, मध्यमाञ्चलका सरोज पुन ७.८५ अंकसाथ दोश्रो तथा पूर्वाञ्चलका उज्ज्वल राई ७.५५ अंकसाथ तेश्रो भए ।
तेक्वान्दो :
महिला ४२ केजीमुनि पूर्वाञ्चलकी विनिता घिमिरे, पश्चिमाञ्चलकी आस्था शर्मा, मध्यमाञ्चलकी योगमाया श्रेष्ठ र मध्यपश्चिमाञ्चलकी प्रमिला थापा सेमिफाइनलमा पुगे । ४६ केजीमुनि मध्यमाञ्चलकी आयशा लामा, पूर्वाञ्चलका प्रबिता राई र चान्दनी तामाङ तथा मध्यपश्चिमाञ्चलकी अनु थारु सेमिफाइनलमा पुगे ।
कोटेश्वर तेक्वान्दो डोजाङमा भएको पुरुष ५१ केजीमुनि मध्यपश्चिमाञ्चलका वृजालाल बुढा, पूर्वाञ्चलका सुरज मगर, सुदूरपश्चिमाञ्चलका नरेश मालासी तथा मध्यमाञ्चलका बर्सात मोक्तान सेमिफाइनलमा पुगे । अन्य तीन तौलसमूहको क्वाटरफाइनल समीकरण पूरा भएको छ ।

प्रतिकृया लेख्नुहोस्:

सूचना विभाग दर्ता न: २२०/०७३-७४
सम्पादक तथा सञ्चालक :
मोतीलाल पौडेल
मोबाइल : ९८५८०५००१०/९८५१२६००१०

YouTube Videos from Kahbarera HD

Subscribe
0 Shares
Tweet
Pin
Share