बुधबार, माघ ५, २०७८

मन्त्री यादवद्वारा सिँचाइमा जोड

१७ जेष्ठ २०७३, सोमबार १३:४७

काठमाडौ, १७ जेठ । सिँचाइ मन्त्री उमेशकुमार यादवले यही चालु आर्थिक वर्षबाट नै सौर्य ऊर्जाबाट सिँचाइको व्यवस्था गर्न मातहतका निकायलाई निर्देशन दिएका छन् ।

सिँचाइ विभागमा आज आयोजित कार्यक्रममा उहाँले सौर्य ऊर्जाबाट किसानका लागि सिँचाइ पु¥याउन निर्देशन दिएका हुन् । नेपालमा सौर्य ऊर्जाबाट सिँचाइको सम्भावनाबारे विभागमा आयोजित कार्यक्रममा मन्त्री यादवले सौर्यबाट सिँचाइ गर्ने कार्य गरेर देखाउन निर्देशन दिए । “यो कार्यक्रमका लागि अर्को आव नकुर्नुस्, भोलिदेखि नै काम सञ्चालन गर्नुस्,” उनले भने ।
मुलुकमा हाल करिब सात लाख हेक्टरमा मात्रै बाह्रैमास सिँचाइ सुविधा उपलब्ध छ । स्यालो र डिप ट्युबवेल जडान गर्नेलगायतको यो कार्यक्रमको कार्यान्वयन भएपछि सिँचाइ सुविधा पुग्ने जमिन करिब १० लाख हेक्टर पुग्ने मन्त्री यादवको भनाइ छ । सोलार प्यानल खेतमा लगाएपछि चोरी हुने सम्भावना बढिरहेको उक्त अवसरमा कर्मचारीहरुले कुरा उठाएका थिए । “चोरी हुन्छ भन्दैमा कार्यक्रम रोक्नु हुँदैन,” उनले भने ।
मन्त्री यादवले किसानको आकर्षण यसप्रति बढ्ने विश्वास व्यक्त गरे । “अब किसानले सिँचाइका लागि डिजेल, पेट्रोल तथा बिजुलीको झन्झट लिनुपर्दैन । सरकारले सौर्य ऊर्जा (सोलार पम्प इरिगेसन)बाट सिँचाइको व्यवस्था गर्नेछ,” उनले भने । दैनिकजस्तो विद्युत्भार कटौतीको समस्या, पेट्रोलियम पदार्थको महँगाइ र समयमा उपलब्ध हुन नसकेका कारण किसान मारमा परेको तथा कृषिमा गरेको लगानी नउठेका गुनासा आइरहेका बेला सरकार उक्त झन्झटबाट मुक्त गराउन लागेको हो ।
मधेसका विभिन्न १० ठाउँमा नमुनाका लागि सौर्य ऊर्जाबाट पम्प जडान गरिने र त्यो सफल भएमा यसलाई अन्यत्र लागू गर्ने मन्त्री यादवले जानकारी गराए । सरकारले हालै ल्याएको बजेटमा पनि सिँचाइमा सौर्य ऊर्जाका लागि बजेटको व्यवस्था गरेको र यो कार्यक्रम कार्यान्वयनमा ल्याउन सजिलो भएको विभागका प्रमुख रमानन्द यादवले बताए । समृद्ध तराई मधेस सिँचाइ विशेष कार्यक्रमअन्तर्गत यस कार्यक्रमलाई सञ्चालन गरिने र ३५ प्रतिशत बजेट सौर्य ऊर्जामा लगाउने उनको भनाइ छ ।
स्यालो ट्युबवेलमा मेसिन जडान गरी सोलारबाट पानी तान्न सकिन्छ । यो प्रविधि भारतमा सञ्चालनमा आएको छ । एक दिनमा एक लाख ३० हजार लिटर पानी दिने सो प्रविधि सुरुमा खर्चालु भए पनि किसान त्यसबाट लाभान्वित हुने विश्वास व्यक्त गरिएको छ । दुई हर्स पावर मेसिनका लागि रु सात लाख, पाँच हर्स पावर मेसिनका लागि रु १० लाखदेखि रु ११ लाख पर्ने अनुमान गरिएको छ । रासस
प्रतिकृया लेख्नुहोस्:

सूचना विभाग दर्ता न: २२०/०७३-७४
सम्पादक तथा सञ्चालक :
मोतीलाल पौडेल
मोबाइल : ९८५८०५००१०/९८५१२६००१०

YouTube Videos from Kahbarera HD

Subscribe
0 Shares
Tweet
Pin
Share