संविधानसभाको पहिलो निर्वाचनका बेला जनतामाझ सेवासुविधा उपलब्ध गराउने घोषणा गरेका  नेता कार्की त्यसलाई पूरा गर्ने अभियानमा जुटेका छन् । भोजपुर– १ बाट उम्मेदवार बनेका कार्कीले सो समयमा जनताको समस्या र आवशयकतालाई ध्यानमा राख्दै दुई विद्यालय र एक सुविधासम्पन्न अस्पताल निर्माण गर्ने घोषणा गर्नुभएको थियो । तीमध्ये दुई विद्यालय बनिसकेको तथा एक अस्पताल निमार्णको अन्तिम चरणमा पुगेको छ ।

जनतासामु गरिएका वाचा अनुरुप गाउँमा स्वास्थ्य र शिक्षाको पूर्वाधार विकास गरी जनतालाई राहत दिन लागिपरेको नेता कार्कीले बताए । भोजपुरको उत्तरी दिङ्लामा निर्मित १५ शय्याको अस्पताल निर्माण अन्तिम चरणमा पुगेको छ । जिल्लाको उत्तरी क्षेत्रमा स्वास्थ्य सेवाको अभावका कारण धेरै बालबालिका र गर्भवतीले अनाहकमै ज्यान गुमाउनुपरेको छ । नेपालका लागि तत्कालीन भारतीय राजदूत राकेश सुद र नेता कार्कीले संयुक्त रुपमा पाँच वर्ष अगाडि दिङ्ला (हालको षडानन्द नगरपालिका) मा रु तीन करोडको लागतमा सो अस्पतालको शिलान्यास गरेका थिए  ।

उत्तरी दिङ्लाका समाजसेवी शम्भु अधिकारीले नेताले वाचा गरे अनुरुप गाउँमा विकास निर्माणमा फर्केकामा खुसी व्यक्त गर्दै अन्य नेताका लागि उदाहरणीय काम भएको बताए  । नेताले घोषणा गरेअनुसार सुविधासम्पन्न विद्यालय र अस्पताल निर्माणले जनतामा खुसी छाएको उनले उल्लेख गरे  ।
अस्पताल निर्माणसँगै भोजपुरका– १४ गाविसका नागरिकले प्रत्यक्ष सेवा पाउने छन् । यस्तै कार्कीले चुनावी घोषणापत्रमा उल्लेख गरेको झ्याउपोखरीको शारदा मावि र भोजपुरको विद्योदय मावि बनी सञ्चालनमा आइसकेको छ । ती विद्यालय क्रमशः रु तीन करोड र रु एक करोडको लागतमा बनेका हुन् । रासस